Vendimi i plotë/ Ndryshojnë kushtet për rishikimin e lejeve të ndërtimit. Kriteret për aplikim për objektet mbi 9 kate
Ndryshojnë kushtet për rishikimin e lejeve të ndërtimit. Janë publikuar së fundmi në “Fletoren Zyrtare”, ndryshimet në Vendimin e Këshillit të Ministrave për miratimin e rregullores së zhvillimit të territorit.
Sipas vendimit “ndryshimet në sipërfaqen ndërtimore të objektit, mbi tokë dhe nën tokë, bëhen brenda kufijve dhe kushteve urbane të zhvillimit, me kusht që ndryshimi i sipërfaqes ndërtimore mbi tokë të mos tejkalojë masën 2% të sipërfaqes ndërtimore mbi tokë të miratuar në lejen e ndërtimit”, thuhet në shtesën e bërë në nenin 17 të Vendimit të Këshillit të Ministrave me datë 13.5.2015
Gjithashtu më tej në vendim thuhet se rastet në të cilat rishikohen kushtet e lejes, sipas nenit 48, të ligjit, pa zmadhuar vëllimin e përgjithshëm të ndërtimit, pa ndryshuar përdorimin dhe kushtet e zhvillimit nga ato të përcaktuara në dokumentet e planifikimit në fuqi dhe nga projekti arkitektonik dhe peisazhistik janë ndryshime
a) të sistemit konstruktiv të objektit apo të punimeve teknike në zbatim;
b) të numrit dhe formës së njësive brenda objektit;
c) për përmirësimin e eficiencës energjetike;
ç) në instalime për sa kohë që rritet cilësia e punimeve;
d) për të shtuar elemente arkitektonike për përdorim të barabartë dhe të pavarur të hapësirave të projektuara nga të gjithë personat, përfshirë ata me aftësi të kufizuara;
dh) ndryshime në fasadë.
Në një tjetër ndryshim të bërë në Vendimin e Këshillit të Ministrave thuhet se
“Ndryshimi i sipërfaqes ndërtimore të përgjithshme, që konstatohet në përfundim të punimeve të ndërtimit të një objekti të ri, nuk konsiderohet shkelje, por marzh gabimi, në rast se nuk tejkalon masën 1% të sipërfaqes ndërtimore të përgjithshme të lejuar me lejen e ndërtimit, me kusht që ndërtimi të jetë në përputhje me kushtet e tjera urbane të zhvillimit” thuhet në shtesën e bërë në pikën 1 të nenit 27, sa i takon certifikatës së përdorimit.
Aplikuesi paraqet kërkesën për t’u pajisur me certifikatë përdorimi, së bashku me procesverbalin e kolaudimit, pranë autoritetit të planifikimit:
a) përmes ngarkimit on-line të dokumentacionit të nevojshëm në portalin përkatës, sipas procedurës së përcaktuar në të;
b) përmes depozitimit të dokumentacionit përkatës pranë sportelit të dedikuar për këtë qëllim, pranë autoritetit kompetent të planifikimit; Në këtë rast, detyrimi i ngarkimit on-line të dosjes së aplikimit është përgjegjësi e këtij autoriteti dhe duhet kryer brenda së njëjtës ditë të depozitimit të kërkesës për leje.
Sa i takon aplikimit për leje ndërtimi për objekte mbi 9 kate vendimi thotë: “Për çdo aplikim për leje ndërtimi për objektet mbi 9 kate, autoritetet vendore të zhvillimit në çdo rast duhet të marrin paraprakisht aktin e konformitetit nga KKT-ja. Procedura për dhënien e aktit të konformitetit përcaktohet me vendim të Këshillit Kombëtar të Territorit. Afatet e parashikuara në rregullore llogariten në ditë pune” thuhet në shtesën e bërë në VKM me nenin 45/2 për afatet e konformitetit.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.