Vendimi i qeverisë/ Shtyhet për herë të dytë brenda pak muajsh procesi i rivlerësimit të banesave!
Këshilli i Ministrave ka shtyrë afatin për procesin e rivlerësimit të banesave. Vendimi parashikon zgjatjen e afatit nga 31 dhjetor 2020 në 30 shtator 2021. Kjo është hera e dytë që shtyhet procesi i rivlerësimit brenda pak muajsh.
Procesi i rivlerësimit të banesave me 3 % ishte parashikuar të përfundonte me 30 shtator të këtij viti, por në muajin korrik qeveria vendosi ta shtyjë më disa muaj afatin duke e bërë deri me 31 dhjetor.
Arsyeja e këtyre shtyrjeve është situata e krijuar nga pandemia që ka sjellë ndër të tjera edhe një rënie të konsiderueshme të aplikimeve për të përfituar nga procesi.
Ministria e Financave parashikon që nga ky proces, të ardhurat në buxhetin e shtetit deri në fund të vitit të jenë rreth 4 miliardë lekë, ndërsa pritet që të rivlerësohen afro 50 mijë banesa. Aplikimi nga qytetarët mund të bëhet edhe on line përmes portalit e-albania.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.