Vendimi i Komunitetit të Energjisë – “S’keni përmbushur detyrimet për efiçencën. Bëjeni pa vonesë”
Këshilli Ministror i Komunitetit të Energjisë ka konstatuar mos plotësim të legjislacionin dhe mungesë të miratimit të planeve të veprimit në drejtim të efiçencës së energjisë nga Shqipëria.
Përmes një vendimi të bërë publik në datën 23 shkurt, konstatohet se vendi ynë është në shkelje të Traktatit të Komunitetit të Energjisë, duke kërkuar përmbushjen pa vonesë të detyrimeve lidhur me efiçencën.
Prej vitit 2006 Shqipëria është pjesë e Komunitetit të Energjisë dhe si e tillë është e detyruar të përmbushë detyrimet që përmban ky anëtarësim. Deri më tani janë ndërmarrë një sërë hapash ligjorë, ndërsa në dhjetor të vitit 2016 është krijuar formalisht dhe Agjencia e Eficencës së Energjisë.
Po ashtu, është miratuar Plani i dytë dhe i tretë Kombëtar i Veprimit për Efiçencën e Energjisë për Shqipërinë, 2017– 2020 i cili synon të ofrojë një vështrim gjithëpërfshirës mbi statusin e zbatimit dhe planet e ardhshme të politikave për efiçencën e energjisë në Shqipëri, si dhe përputhshmërinë e tyre me angazhimet e vendit në kuadrin e Komunitetit të Energjisë.
Gjithashtu, në përputhje me detyrimet që rrjedhin nga anëtarësimi në këtë komunitet, është miratuar Plani Kombëtar i Veprimit për Burimet e Energjisë së Rinovueshme, i cili përcakton objektivin që, deri në 2020, 38% e konsumit final të energjisë të jetë nga burimet e energjive të rinovueshme dhe përcakton masat e synuara për përmbushjen e tij.
Ndërkaq, sipas një raporti të publikuar një ditë më mbi varfërinë energjetike, mbi 65% e familjeve me të ardhura deri në 50 mijë lekë kanë vështirësi të paguajnë faturën e energjisë. Rezultatet e këtij raporti faktojnë situatën aktuale në vend dhe i hapin rrugën nxitjes së politikave dhe praktikave më të mira që sigurojnë efiçencën e energjisë, diversifikimin e burimeve për energji të pastër dhe me kosto të përballueshme nga qytetarët e shtresave të varfra dhe të mesme në Shqipëri.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.