Vendimi/Profesionet e lira në skemën e TVSH që nga kufiri 0
Profesionet e lira do të paguajnë TVSH nga kufiri minimal zero pavarësisht xhiros vjetore. Vendimi i sotëm i Këshillit të Ministrave thotë që personat si avokat, noter, mjek i specializuar, dentist, dentist i specializuar, farmacist, infermier, veteriner, arkitekt, inxhinier, mjek-laborant, projektues, ekonomist, agronom, ekspert kontabël i regjistruar, kontabilist i miratuar dhe vlerësues i pasurisë janë të tatueshëm.
Ndërkohë, për prodhuesit bujqësorë që aktualisht përfitojnë skema bujqësore, kufiri minimal është rikthyer në 5 milionë lekë.
Kurse për shoqëritë e përbashkëta bujqësore, nëse bëjnë vetëm shitjen e prodhimeve te tatimpagues që nuk janë pjesë e skemës së kompensimit nuk do të aplikohet kufiri i TVSH. Ama, nëse ofrojnë edhe shërbimet të tjera, do të te regjistrohen automatikisht në kufirin minimal të Tatimit mbi Vlerën e Shtuar.
Ndërkohë, në vendim përfshihet edhe një shtesë mbi afatin e paraqitjes së deklaratës dhe regjistrave përmbledhës për kategorinë e personave me qarkullim dy vjetor deri në 5 milionë lekë.
Ata duhet dorëzojnë deklaratën e TVSH-së mbi baza mujore, brenda datës 14 të muajit të parë pas përfundimit të çdo tremujori të vitit kalendarik.
Së bashku me deklaratën, ata do të duhet të dorëzojnë gjithashtu edhe regjistrat përmbledhës përkatësisht librin e blerjes dhe librin e shitjes, mbi baza mujore, brenda datës 10 të muajit të parë pas përfundimit të çdo tremujori të vitit kalendarik.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.