Vendimi i qeverisë për ish-pronarët – Tabaku: Do marrin një shpërblim qesharak financiar

Nënkryetarja e Komisionit të Ekonomisë, Jorida Tabaku ka reaguar në një deklaratë për shtyp mbi vendimin e miratuar për kompensimin e pronave për pronarët e shpronësuar gjatë regjimit komunist.

Vendimi parashikon kompensimin financiarisht deri në 20 për qind të vlerës totale dhe në çdo rast jo më shumë se 10 milionë lekë.  Sipas saj, ky vendim po zbatohet në mënyrë abuzive, duke injoruar edhe Gjykatën Kushtetuese, e cila një vit më parë rrëzoi disa pika të rëndësishme të ligjit.

“Kompensimi i jo më shume se 20% e vlerës së pronës apo kompensimi me jo më shumë se 1 milionë lekë gjatë 10 vjetëve është përbuzja më e madhe për pronarët që qeveria Rama e bën në dhunim të plotë të së drejtës së patjetërsueshme për pronën.”

Tabaku shtoi më tej se ky vendim është në dëm të pronarëve, që sipas saj do të marrin një shpërblim qesharak financiar.

“Ky është një vendim tërësisht në dëm të interesave të ligjshme të pronarëve, të cilët do marrin një shpërblim qesharak financiar, ndërsa pjesën kryesore të kompensimit do ta marrin me troje, të cilat në pjesën dërrmuese të tyre janë të pashfrytëzueshme, larg zonave të banuara dhe pa asnjë interes zhvillimi.”

Ndërkohë, ka theksuar se Partia Demokratike i qëndron bindjes se ky ligj është antikushtetues.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.