Vendosja masive e tarifave – Jack Ma: SHBA do të ‘vuajë më shumë’ luftën e tregtisë me Kinën

Në “Luftën e Ftohtë” të re midis Shteteve të Bashkuara të Amerikës dhe Kinës, me sa duket deri më tani po fiton SHBA, pasi dollari po lulëzon dhe amerikanët kanë ‘thithur’ më shumë importe kineze.

Megjithatë, sipas Jack Ma-it, themeluesi dhe kreu ekzekutiv Alibaba, është SHBA-ja ajo që do të përfundojë me humbje. Në fjalën e tij në konferencën e Kinës së Jugut, Ma tha se SHBA do të “vuajë më shumë”, duke shtuar se nuk kishte si të ndodhte ndryshe pas vendosjes masive të tarifave si një zgjidhje për mosbalancimin e tregtisë së vendeve.

Situatën e  krijuar e ka komentuar po ashtu edhe zëvendëspresidenti ekzekutiv i Alibaba, Joe Tsai, i cili tha se SHBA po reagonte ndaj “frikës së pabazë që rritja e Kinës do të të kërcënojë sigurinë kombëtare dhe mirëqenien e popullit amerikan.”

Sipas tij, ‘dhimbja’ e luftës tregtare nuk do të ndihet vetëm tek SHBA, por në mbarë botën.

Ndërkohë, Ma ka bërë tashmë të qartë se ai nuk është një ‘tifoz’ i luftës tregtare të presidentit Donald Trump ndaj Kinës. Muajin e kaluar ai deklaroi se Alibaba nuk mund të mbajë premtimin e bërë më herët për të krijuar 1 milionë vende të reja pune në SHBA, për shkak të situatës së krijuar midis dy vendeve.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.