Venezuela nuk feston – Mungesë e theksuar e parasë, ndërkohë që dyqanet kërkojnë dollarë
Rreshtat e gjatë jashtë bankave dhe bankomateve në Venezuelë janë bërë diçka e zakontë, ndërkohë që ekonomia e vendit vazhdon të bie dhe inflacioni rritet. Për një dekadë e gjysmë, kontrollet strikte të këmbimit kanë limituar aksesin ndaj dollarit amerikan. Për rrjedhojë, tregu i zi i valutave është zgjeruar, në një kohë që të ardhurat dikur të larta të naftës po reduktohen.
Tashmë, shumë dyqane në vend kanë nisur të pranojnë vetëm dollarë, duke hequr aksesin e mallrave dhe shërbimeve për banorët e vendit. Sipas Asamblesë Kombëtare të udhëhequr nga opozita, rritja e çmimeve për Nëntorin ka kaluar referencën e akademikëve për hiperinflacionin në më shumë se 50% në muaj, ndërkohë që pritet të arrijë 2,000% në fund të këtij viti. Qeveria nuk ka publikuar të dhëna për nivelin e çmimeve në më shumë se 1 vit.
Banorët e vendit thonë se u lejohet të tërheqin vetëm 10,000 bolivarë në ditë, që sipas tyre nuk mjafton as për ushqim. Qeveria socialiste e ish-presidentit Hugo Chaves, prezantoi kontrollet strikte në vitin 2013, në mënyrë që të frenohej dalja e kapitalit, ndërkohë që të pasurit po nxirrnin paranë nga Venezuela prej pasigurive politike dhe ekonomike.
Presidenti Nicolas Maduro, ka mbajtur politikat e paraardhësit të tij mbi kontrollet e kapitalit. Megjithatë, spread-i mes normës zyrtare prej 10 bolivarë për dollar, dhe ajo e tregut të zi prej, 110,000 bolivar për dollar, është rritur frikshëm. Në vetëm një vit, valuta e Venezuelës është dobësuar me 97.5% kundër dollarit, që nënkupton se ekuivalenti i 1,000 dollarëve në valutën vendase atëherë, vlen tashmë vetëm 25 dollarë.
Rritja gjigante e çmimeve ka penguar edhe festat e Krishtlindjeve, që u karakterizuan këtë vit me mungesë të pemëve të vitit të ri dhe mungesës së produkteve ushqimore për të përgatitur tryezën. Duke e kthyer në shaka situatën, një pemë në Maracaibo, kryeqytetin e naftës dhe qytetin e dytë më të madh të vendit, ishte dekoruar me kartëmonedha me prerje të vogla, që virtualisht nuk vlejnë asgjë. Maduro fajëson faqet në web që publikojnë kurset e këmbimit, si DolarToday, për fryrjen e shifrave.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.