Venezuela, plan për krijimin e një monedhe të re digjitale të quajtur “Petro”
Presidenti i Venezuelës, Nicolas Maduro ka njoftuar krijimin e një monedhe të re virtuale në përpjekje për të lehtësuar krizën ekonomike të vendit.
Ai tha se Petro, kjo monedhë digjitale do të mbështetet nga pasuria e naftës, gazit, arit si dhe diamantit të Venezuelës.
Ekonomia e Venezuelës është goditur nga rënia e të ardhurave të naftës si dhe rënia e monedhës së saj ekzistuese, Bolivarit.
Presidenti Maduro gjithashtu i ka cilësuar sanksionet e Shteteve të Bashkuara si një “bllokadë”.
Në një njoftim televiziv, Maduro tha se kjo monedhë e re do ta lejonte Venezuelën “të përparonte në çështjet e sovranitetit monetar si dhe do të ndihmojë në kapërcimin e bllokadës financiare.
Kjo lëvizje vijon rritjen e interesit global në monedhën digjitale bitcoin.
Një rregullator i Shteteve të Bashkuara të Amerikës, tha se do të lejonte fillimin e tregtimit të kontratave financiare të lidhura me bitcoin, edhe pse kjo monedhë digjitale vazhdon të shfaqë paqëndrueshmëri.
Venezuela i detyrohet 140 miliardë kreditorëve të huaj dhe ekonomistët thonë se Maduro do të përpiqet t’i paguajë ata më Petro pasi ai kërkon ristrukturimin e borxhit të vendit.
Deputetët e opozitës këmbëngulën se monedha e propozuar do të ketë nevojë për mbështetjen e Kongresit dhe disa dyshojnë që kjo të ndodhë ndonjëherë.
Venezuela është mbështetur gjithmonë në pasurinë e saj të naftës për të mbështetur ekonominë e saj, por një rënie e çmimeve të naftës e ka çuar vendin në krizë ekonomike dhe politike.
Shtetet e Bashkuara dhe Bashkimi Evropian kanë vendosur sanksione, duke cituar politikat shtypëse nga qeveria.
V.H/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.