Vera “fryn” depozitat – Në dy muaj u rritën me 15 miliardë lekë
Muaji gusht nuk i zhgënjeu parashikimet dhe solli një tjetër rritje të ndjeshme të depozitave bankare. Sipas të dhënave nga Banka e Shqipërisë, për muajin gusht totali i depozitave të përfshira në treguesin e parasë së gjerë, u rrit me 10 miliardë lekë. Gjithsej, gjatë korrikut dhe gushtit depozitat u rritën me 15 miliardë lekë ose rreth 123 milionë euro. Vlera totale e depozitave arriti në një trilion lekë e 10 miliardë lekë, në rritje me 3% krahasuar me një vit më parë.
Siç mund të pritej, rritja e depozitave për muajin gusht ka ardhur nga rritje e fortë e fondeve në valutë të future në sistemin bankar. Vetëm për një muaj, depozitat në valutë të huaj u rritën në ekuivalentin e 16 miliardë lekëve. Ndërkohë, depozitat në monedhën vendase gjatë gushtit ranë me 6 miliardë lekë.
Kjo e thelloi edhe më shumë peshën e euros në strukturën e depozitave të sistemit bankar, duke e çuar në pothuajse 55% të totalit. Rritja e prurjeve në euro gjatë sezonit veror ishte e pritshme dhe reflekton të ardhurat në rritje nga turizmi dhe nga emigrantët në ekonominë shqiptare. Përtej ndikimit të faktorëve sezonalë gjatë muajit gusht, duket se euro ngelet zgjedhja e parë e shqiptarëve për të mbajtur kursimet e tyre. Publiku vazhdon të preferojë euron, pavarësisht nga nënçmimi i monedhës europiane në kursin e këmbimit me lekun dhe pavarësisht përpjekjeve të Bankës së Shqipërisë për të ulur euroizimin e sistemit financiar.
Ekonomia shqiptare ka një nivel të lartë euroizimi në transaksionet e brendshme dhe asetet me vlerë të madhe kuotohen përgjithësisht në euro. Kjo ndoshta bën që publiku ta perceptojë euron si një ruajtëse më të mirë të vlerës në kohë, pavarësisht se ajo është nënçmuar në kursin e këmbimit me lekun.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.