Verën e ardhshme do të kalohet nga Dogana e rehabilituar Morinë-Vërnicë
Projekti për një pikë të përbashkët Doganore për shkak të rritjes së shkëmbimeve tregtare midis Kosovës dhe Shqipërisë ka zgjedhur sot operatorin fitues.
Projekti u zhvillua në dy faza, ku në fazën e parë u bënë ndërhyrjet e para për pikën Morinë-Vërmicë, ndërsa faza e dytë parashikonte ndryshime dhe ndërtimin e një pike të re të kalimit kufitar.
Kriteret e përzgjedhjes së operatorit kanë shpallur fitues Shoqërinë “VEGA” shpk, si oferta më e suksesshme me një vlerë lekësh prej 71.5 milionë lekësh.
Ofertuesit e tjerë B.O: “ Viante Construcsion” shpk dhe “SAG”shpk janë skualifikuar nga gara për mosplotësimin e kritereve të kërkuara nga Drejtoria e Përgjithshme e Doganave.
Kohëzgjatja e kontratës parashikon një afat kohor rreth 8 muaj. Kështu, ndërtimi i pikës së re të kalimit kufitar Morinë- Vërnicë pritet të përfundojë në muajin qershor.
Punimet, ndër të tjera, parashikojnë:
- Shembjen e një godine ekzistuese;
- Heqjen e një ure ekzistuese;
- Heqjen e pjesshme të një strehe e cila do të zgjerohet;
- Heqjen e plotë të kabinave ekzistuese për ri-projektimin total të zonës së kontrollit të mjeteve;
- Rinovimin e ndërtesës ekzistuese të administratës për të plotësuar shërbimet e Pikës së Përbashkët të Kalimit Kufitar;
- Rinovimin e godinës së pritjes ekzistuese me qëllim shtimin e zyrave dhe dhomave të reja teknike;
- Ndërtimi i një godine të re për administratën;
- Ndërtimi i një terminali të ri të autobusave me destinacion Shqipërinë;
- Ndërtimi i një terminali të ri të autobusave me destinacion Kosovën;
- Ndërtimi i një godine të re për inspektimin dhe shkarkimin;
- Implementimin e rrjeteve të reja: elektrik, IT, uji i pastër, uji i ndotur, uji i shiut, ngrohje ventilim (HVAC).
Genta Dobra/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.