Veriu vijon të jetë zona më e varfër në Shqipëri – PBB për frymë, Kukësi sa gjysma e Tiranës
Veriu vijon të mbetet rajoni me Prodhimin e Brendshëm Bruto për frymë më të ulët në të gjithë Shqipërinë. Ndonëse me një rritje të lehtë në vitin 2015 falë kontributit të ekonomive të Lezhës, Shkodrës dhe Durrësit, PBB për frymë qëndron pak mbi 403 mijë lekë në vit, 92 mijë lekë më pak se mesatarja e të gjithë vendit.
Nëse nga aritmetika për llogaritjen e shumës do të përjashtonim Durrës, atëherë shifrat për këtë rajon do të ishin edhe më të ulëta, nën 360 mijë lekë për frymë.
Edhe qarku më i varfër në Shqipëri, Kukësi, gjendet pikërisht në këtë rajon, me një mesatare prej 318 mijë lekësh në vit, në rënie nga viti i mëparshëm. Për t’i dhënë një dimension të tretë shifrave të këtij qarku, mjafton t’i krahasojmë me mesataren e Shqipërisë (-177 mijë lekë) dhe mesataren e Tiranës (-360 mijë).
Për nga PBB për frymë ndjekin si më të varfrat qarqet e Elbasanit, Lezhës, Dibrës dhe Shkodrës, ndërsa më të pasurat vijojnë të mbeten Tirana, Fieri, Gjirokastra dhe Durrësi.
Qarku i Tiranës ka shënuar një rritje prej 5.5% krahasuar me vitin 2014 dhe PBB për frymë është 37% mbi mesataren e vendit. Ndonëse Qarku i Fierit ka patur rënien më të madhe për vitin 2015, PBB për frymë mbetet ende 11% mbi mesataren e vendit.
Sa i takon ndryshimit nga viti në vit, të dhënat e INSTAT tregojnë se ekonomia po balancohet me ritme të ulëta midis Veriut dhe Jugut, ndërsa Qendra e vendit, ose më mirë të themi Tirana është motori i vërtetë që nxit rritjen e Prodhimit të Brendshëm Bruto.
Krahasuar me Standardin e Fuqisë Blerëse të Bashkimit Europian, edhe rajoni më i pasur në Shqipëri nuk shkon përtej 1/3 së mesatares së vendeve të unionit, me PBB për frymë në këtë standard për të gjithë vendin sa 29.6% e BE-së.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.