Vetëdeklarimi i adresave nga emigrantët – Ja procedurat që duhet të ndjekin për plotësimin e formularit
Janë përcaktuar rregullat e reja mbi detyrimin e vetëdeklarimit të adresës nga shtetasit shqiptarë që jetojnë jashtë Shqipërisë si dhe procedura e plotësimit dhe dorëzimit të formularit dhe dokumentave shoqëruese të tij.
Njoftimi i detyrimit ligjor të vetëdeklarimit të adresave nga emigrantët do të të bëhet përmes dy metodave: publikimit në faqet zyrtare elektronike të Ministrisë së Brendshme dhe Ministrisë për Evropën dhe Punët e Jashtme si dhe nëpërmjet programeve, reklamave dhe spoteve për transmetim nga operatorë radiotelevizivë, fletëpalosjeve, takimeve me përfaqësues të shoqatave shqiptare jashtë vendit dhe të organizatave ndërkombëtare që mbrojnë të drejtat e emigrantëve.
Ata mund të aplikojnë në mënyrë elektronike ose manuale. Sa i takon dorëzimit të formularit, emigrantët mund dërgojnë përmes postës pranë misioneve diplomatike ose postave konsullore ose mund të paraqiten fizikisht pranë tyre.
“Bëjnë përjashtim nga konfirmimi i adresës, nëpërmjet shërbimit postar, rastet kur shtetasi plotëson dhe dorëzon formularin me paraqitjen e tij fizike pranë nëpunësit përgjegjës dhe, bashkë me formularin, paraqet çdo dokument ligjor, i cili provon adresën e tij, të njohur nga autoritetet e vendit ku jeton.
Në rastet kur adresa konfirmohet nëpërmjet shërbimit postar, nëpunësi përgjegjës kryen veprimet përfundimtare për regjistrimin e adresës së shtetasve, të cilët janë deklaruar në formular dhe janë verifikuar si pjesëtarë të familjes së deklaruesit, sipas manualit të miratuar për këtë qëllim.
Pas përfundimit të procedurës së identifikimit dhe regjistrimit të adresës, nëpunësi përgjegjës do të administrojë dokumentacionin, me anën e të cilit u krye regjistrimi i adresës, sipas rastit:
- a) për aplikimin në mënyrën elektronike dhe në mënyrën manuale para nëpunësit përgjegjës do të ruhet konfirmimi i sjellë nga shërbimi postar;
- b) në rastet kur aplikimi kryhet sipas pikës 10, të këtij vendimi, atëherë nëpunësi përgjegjës do të ruajë, përveç formularit të vetëdeklarimit, edhe kopjen e dokumentacionit me anë të të cilit shtetasi ka provuar adresën e tij”, thuhet ndër të tjera në vendim.
Sa i takon dokumentacionit mbi bazën e të cilit kryhen veprimet për regjistrimin e adresës, do të ruhet për një afat kohor prej 5 vjetësh. Ndërsa, lidhur me kostot financiare të kësaj procedure, do të mbulohen nga Ministria e Brendshme dhe Ministria për Europën dhe Punët e Jashtme, parashikuar në buxhetin e vitit 2018.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.