Vetëm 2 në 5 shqiptarë me gjuhë të huaj – Dominon anglishtja, e flasin mbi gjysma e të rinjve
Vetëm 29.9% e shqiptarëve janë në gjendje të përdorin të paktën një gjuhë të huaj. Kjo e dhënë vjen nga anketa më e fundit e publikuar nga Instituti i Statistikave mbi arsimin e të rriturve.
Çka vihet re në përgjigjet e mbi 5 mijë familjeve të pyetura, është raporti i të diturit i një gjuhe të huaj në varësi të moshës. Më të rinjtë janë më të predispozuar për të mësuar një gjuhë të huaj se sa më të rriturit dhe niveli i të folurit një gjuhe tjetër varion nga 23,3% për moshat 55-64 vjeç, deri në 58.9% për moshat 25-34 vjeç.
Kjo do të thotë se 3 nga 5 të rinj flasin një gjuhë të huaj, krahasuar me vetëm 1 ndër 5 individë deri në 64 vjeç.
Diferencat vihen re edhe në gjuhën e folur, ku ndër moshat mbi 45 vjeç mbizotëron gjuha greke, ndërsa tek moshat 35-44 vjeç gjuha italiane dhe së fundmi tek moshat e reja dominon në mënyrë të ndjeshme gjuha angleze. Ky ndryshim është i lidhur me gjeneratat e popullsisë, ku më të vjetrit kanë mësuar greqishten në emigrim për arsye punësimi, ku gjenerata e “baby-boomers” është influencuar më shumë nga kultura italiane dhe së fundmi të rinjtë kanë më të nevojshme gjuhën angleze për shkak të internetit dhe zhvillimeve teknologjike.
Në total, gjuha më e njohur është ajo angleze me 40%, ndjekur nga italishtja me 27.8% dhe greqishtja me 22.9%.
Rezultatet e anketës nuk përfshijnë përgjigjet e individëve mbi 65 vjeç, apo të fëmijëve dhe të rinjve deri në 24 vjeç. Megjithatë, bazuar në modelin e mësipërm mund të hamendësojmë lehtë se përhapja e gjuhëve të huaja është shumë më e lartë tek moshat e reja, ku sërish mbizotëron anglishtja si gjuhë më e njohur.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.