Vetëm 54 anije në flotën detare – OKB: Anijet me kapacitet transporti mbi 1000 ton, të fundit në rajon

Shqipëria ka vetëm 54 anije të transportit detar, të paktën sipas kriterit të Konferencës së Kombeve të Bashkuara për Tregti dhe Zhvillim, ( UNCTAD ) që klasifikon si të tilla vetëm anijet me një kapacitet prej 1000 tonelatash.

Raporti i fundit i tregtisë, i publikuar së fundmi nga organizata e Kombeve të Bashkuara, nënvizon pikërisht faktin se Shqipëria ka vetëm 54 anije të tilla, gjë që gjeneron për rrjedhojë edhe një performancë mjaft të dobët të vendit tonë në drejtim të transportit detar.

Për të kuptuar se çfarë do të thotë realisht kjo shifër, mjafton që të bëjmë një krahasim të vogël me vendet përreth. Mali i Zi raportohet të ketë një flotë prej 140 anijesh të tilla, pra thuajse tre herë më shumë së vendi ynë, ndërsa Kroacia plot 2073, ose 40 herë më shumë se vendi ynë. Flota e Italisë është 15900 anije, ajo e Greqisë 75 mijë anije dhe ajo e Maltës plot 99 mijë të tilla, çka konfirmon edhe një herë supremacinë e këtyre vendeve në drejtim të transportit detar.

Këto të dhëna bëjnë që Shqipëria të ketë një performancë mjaft të dobët në drejtim të tregtisë pasi nuk shfrytëzon potencialin më të madh që mund të ketë një vend në këtë drejtim, pra daljen në det. Tregtia, veç asaj që gjeneron në Prodhimin e Brendshëm Bruto të një vendi dhe mirëqenien e shoqërisë për rrjedhojë, ka një ndikim të patjetërsueshëm edhe në pozitat gjeopolitike të një vendi.

Një flotë detare prej vetëm 54 anijesh tregon jo vetëm termat e tregtisë mjaft të ulëta, por sidomos cilësinë e kësaj tregtie, që ndoshta në shumë raste bëhet nëpërmjet anijeve me kapacitet nën 1000 tonë, pra nën çdo standard ndërkombëtar. Të dhënat e përpunuara nga Organizata e Kombeve të Bashkuara i referohen vitit aktual.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.