Vetëm 6.5% e studentëve janë vaksinuar – COVID-19/ Vokshi: Mësuesit paguhen me 80% të raportit. Asnjë masë për teste falas për nxënësit
Vetëm 3.22% e studentëve në të gjithë vendin janë vaksinuar me 2 dozat e vaksinës për COVID-19, ndërkohë që me një dozë janë vaksinuar 8000 studentë apo rreth 6.5% e totalit. Të dhënat u bënë me dije nga ministrja e Shëndetësisë dhe Mbrojtjes Sociale, Ogerta Manastirliu gjatë raportimit në Komisionin parlamentar të Punës, Çështjeve Sociale dhe Shëndetësisë, mbi masat e marra për fillimin e vitit shkollor dhe akademik.
Ndërkaq, kryetarja e komisionit, Albana Vokshi e vuri theksin te mungesa e trajtimit për mësuesit e prekur nga COVID-19, duke bërë me dije se po iu paguhet 80% e raportit mjekësor, ndonëse ekziston një vendim qeverie që përcakton se për të prekurit nga infeksioni raporti do të paguhet në masën 100%.
Vokshi akuzoi qeverinë për keqmenaxhimin e pandemisë në institucionet arsimore, duke qenë se deri më tani rezultojnë të prekur mbi 13 800 nxënës dhe 9400 mësues. Ndërkohë që, Manastirliu tha se mësuesit ishin kategoria e dytë, pas mjekëve që u vaksinuan. Sipas saj, aktualisht janë vaksinuar mbi 90% e mësuesve dhe mbi 60% e stafit mbështetës në shkolla.
Paralelisht, deputetët e opozitës akuzuan qeverinë se nuk ka marrë asnjë masë për testimin flas të fëmijëve, duke sjellë edhe shembuj nga Greqia, që aktualisht rimburson 2 teste të shpejtë në javë për çdo fëmijë, si një formë për të frenuar përhapjen e COVID-19.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.