Vetting, “boom” i apeleve – Kushtetuesja pa asnjë anëtar nëse Dedja rrëzohet nga Kolegji
Ndërsa gjysma e dytë e nëntorit shënoi shtim të ritmeve të vendimeve nga Komisioni i Pavarur i Kualifikimit, i cili përfundoi listën e magjistratëve që ju nënshtruan rivlerësimit me përparësi, e njëjta gjë po ndodh edhe me apelin e vetting-ut.
Kolegji i Posaçëm i Apelimit ka shpallur të paktën 3 seanca gjyqësore me magjistratë që kanë kaluar shkallën e parë të Vetting-ut, por janë ankimuar nga Komisioneri Publik, duke u kthyer për rigjykim.
Bëhet fjalë për Kreun e Gjykatës Kushtetuese Bashkim Dedja, për anëtarin e Gjykatës së Lartë Edmond Islamaj dhe për gjyqtaren e Tiranës Alma Brati. Ata do paraqiten përpara Kolegjit të Posaçëm të Apelimit në datat 18, 19 dhe 20 dhjetor.
Të tre janë kthyer në apel nga Komisioneri Publik, me rekomandimin e ONM, sipas të cilëve konfirmimi i tyre në detyrë nuk është bindës dhe se të tre duhet t’i nënshtrohen vlerësimeve më të thelluara lidhur me pasuritë e tyre.
Sigurisht që emri më i rëndësishëm mes tre magjistratëve që do kalojnë në apel është ai i Bashkim Dedjas, jo vetëm për faktin se është Kreu i Gjykatës Kushtetuese, por edhe sepse është anëtari i vetëm me mandat aktiv o këtij organi.
Anëtarja tjetër e Gjykatës Kushtetuese që kaloi Vetting-un, Vitore Tusha, jo vetëm që është me mandat të përfunduar, por edhe është një prej kandidaturave më të mundshme për të marrë postin e Kreut të Kontrollit të Lartë të Shtetit, gjë që e largon përfundimisht nga Gjykata Kushtetuese.
Një shkarkim i mundshëm i Dedjas do të sillte një situatë krejt të paprecedentë, me Gjykatën Kushtetuese pa asnjë anëtar.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.