Vetting, “boom”-i i Korrikut – Mbi 40 seanca, në sitë peshat e rënda të Gjykatës së Lartë dhe Kushtetueses
Muaji korrik ka shënuar një “boom” të vërtetë për vetting-un e Gjyqtarëve e Prokurorëve. Në total, dy organet e rivlerësimit, Komisioni i Vlerësimit dhe Kolegji i Posaçëm i Apelimit kanë kryer rreth 40 seanca, përmes të cilave kanë kaluar disa prej emrave më me peshë në sistemin e drejtësisë.
Më dramatike kanë qenë zhvillimet në Komisionin e Pavarur të Kualifikimit, ku janë rrëzuar këtë javë dy kandidatë të Gjykatës Kushtetuese. Gara për ngritjen e Gjykatës Kushtetuese hodhi të premten një tjetër hap pas. Të enjten u shkarkua nga Vetting-u Gjyqtari Ilir Mustafaj, Gjyqtar i Tiranës, ndërkohë që të njëjtin fat ka pësuar një ditë më pas edhe kandidatja tjetër Anila Guri Kristani.
Ashtu si dhe kolegu i saj Ilir Mustafaj, Guri, Gjyqtare e Tiranës, nuk arriti të kalonte testin e pasurisë. Komisioni i Pavarur i Kualifikimit arriti në përfundimin se ajo nuk justifikonte me burime të ligjshme financiare pasuritë familjare, përfundimin në të cilin kishte arritur më herët edhe Inspektorati i Lartë i deklarimit të Pasurive.
Ndërkohë që të premten ka qenë një emër tjetër i rëndësishëm i sistemit të drejtësisë që i është nënshtruar Vetting-ut. Bëhet fjalë për kandidatin për postin e Prokurorit të Përgjithshëm Olsian Çela, i cili aktualisht, pas seancës dëgjimore, është në pritje të vendimit të Komisionit që do jepet javës tjetër.
Sa i përket Kolegjit të Posaçëm të Apelimit, zhvillimi më i rëndësishëm ka qenë ai i Kreut të Gjykatës së Lartë Xhezair Zaganjori, i cili, u detyrua të paraqitej në apelin e Vetting-ut pasi u konfirmua në detyrë verën e shkuar. Vendimi për konfirmimin e tij nuk bindi ONM-në dhe Komisionerin publik, sipas të cilëve, hetimi ndaj pasurisë së Kreut të Gjykatës së Lartë kishte qenë i paplotë dhe jo shterues. Vendimi përfundimtar për Zaganjorin do të jepet më 26 korrik. Artan Broci, një tjetër emër nga Gjykata e Lartë del në korrik përpara trupës së apelit. Në të kundërt të Zaganjorit, ka qenë Broci ai që i është drejtuar apelit për të rrëzuar vendimin e shkallës së parë i cili e shkarkoi nga detyra.
Gentjan Osmani, anëtar i Këshilli të Lartë të Prokurorisë dhe ish prokuror i dosjes Tahiri, është një tjetër “peshë e rëndë” që në korrik nisi procesin e apelimit. Edhe në rastin e Osmanit ishte ONM dhe Komisioneri Publik që ankimuan konfirmimin e tij në detyrë, duke kërkuar hetim më të thellë për burimet financiare të familjes së tij.
Alma Brati, ish kandidate e Këshilli të Lartë Gjyqësor humbi këtë muaj betejën ndaj Komisionerit Publik, duke u shkarkuar nga detyra, ndërsa ishte një prej emrave të parë që kaloi me sukses shkallën e parë të Vetting-ut verën e shkuar.
Dritan Rreshka, ish Kreu i Prokurorsë së Tiranës është emri tjetër me peshë që humbi përfundimisht në apel betejën me Vetting-un, ndërkohë që nisi përballjen në shkallën e dytë të Vetting-ut edhe Artuar Malaj, kandidat për Inspektorin e Lartë të Drejtësisë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.