Vetting, në sitë 4 magjistratë – Konfirmohen prokurorët Goxhi e Progonati, ngec Kryegjyqtari i Pukës
Komisioni i Pavarur i Kualifikimit ka konfirmuar të enjten Kreun e Prokurorisë së Beratit Eloida Goxhi dhe Alfred Progonatin e Prokurorisë së Përgjithshme. Të dy magjistratët ju nënshtruan procesit të rivlerësimit për të tre komponentët: pasurinë, integritetin dhe profesionalizimin.
Drejtuesja e Prokurorisë së Beratit Eloida Goxhi nuk zotëronte pronë të sajën dhe banonte në një apartament me prindërit, ndërkohë që pasuria e saj përbëhej nga një shumë prej 2.2 milionë lekësh e investuar në bono thesari.
Më e gjatë ishte lista e pasurive të Prokurorit të Priokurorisë së Përgjithëshme Alfred Progonati. Atij ju desh të jepte shpjegime për një apartament me sipërfaqe 126 metra katrorë në Tiranë me vlerë 70 mijë euro, i blerë përmes një kredie prej 31 mijë eurosh dhe kursimeve familjare. Atij ju desh të jepte shpjegime edhe për disa shpenzime për shkollimin e së bijës në Gjermani, duke sjellë prova se ajo mbulonte një pjesë të kostove përmes punës së saj.
Që të dy magjistratët kishin marrë vlerësime pozitive nga DSIK për pastërtinë e figurës dhe nga Prokuroria e Përgjithshme për aftësitë profesionale.
Ndërkohë që nuk e pati këtë fat Kryetari i Gjykatës së Pukës, Izet Kadana. Problem për gjyqtarin qenë të paktën 19 mesazhe kërcënuese të dërguara ndaj një qytetareje, të cilës Kadana i shkruante “a e di ti kush jam unë” dhe “do ta shikosh çdo të bej”, gjë që solli edhe shpërthimin e përfaqësuesit të ONM-së në sallë. Sipas gjetjeve të KPK, e njëjta qytetare ishte shmangur nga gara për një vend pune, të cilën e kishte fituar bashkëshortja e gjyqtarit. Zbardhja e kësaj përplasjeje qe edhe nje prej motiveve kryesore që sollën shkarkimin e Kreut të Gjykatës së Pukës.
Po të enjten u paraqit përpara trupës gjykuese të KPK edhe Arben Zefi, i Gjykatës së Shkodrës, i cili kërkoi më shumë kohë për njohjen me provat.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.