Vetting Prokurorit të Shkodrës – Komisioni kundër ILDKPI-së, vlerësimi i pasurisë gabim
Vatë Staka, prokuror pranë Gjykatës së Rrethit Gjyqësor Shkodër, duket se do të jetë subjekti i radhës që do të kalojë me sukses testin e Vetting-ut. Ai është paraqitur pasditen e së hënës në seancë dëgjimore me Komisionin e Pavarur të Kualifikimit, ku është vlerësuar pasuria, integriteti dhe niveli i tij profesional. Sipas relatores së çështjes Etleda Çiftja, Staka zotëron një pasuri modeste të përbërë nga një shtëpi me sipërfaqe 131 metra katrorë, në Shkodër, ndërtuar mes viteve 1993-1995, me vlere 280 mije leke. Po ashtu ai zotëron edhe parcelën me sipërfaqe 300 metra katrorë mbi të cilën është ndërtuar kjo shtëpi, në bashkëpronësi me bashkëshorten.
Ajo që ka krijuar paqartësi lidhur me pasurinë e Prokurorit. Ka qenë qëndrimi i Inspektoratit të Lartë të Deklarimit të Pasurive. Fillimisht, përpara nisjes së procesit të Vetting-ut, ILDKPI i ka konsideruar korrekte deklaratat e pasurisë së Stakës. Por përmes një letre dërguar më 7 qershor 2018, ILDKI është shprehur se deklaratat kamë pasaktësi. Por nga hetimi i vetë Komisionit të Vetting-ut, vlerësimi i ILDKPI ka rezultuar i gabuar dhe letra nuk është marrë parasysh në hetim. Relatorja e çështjes Etleda Çiftja bëri me dije se hetimi u shtri te familjarët e Prokurorit, deri edhe te nipi i tij.
Staka, i cili është njëherësh kandidat për Këshillin e Larte te Prokurorisë u konsiderua i përshtatshëm edhe për dy komponentët e tjerë, të profesionalizmit dhe integritetit personal.
Me herët, po gjatë ditës së mërkurë, Komisioni i Pavarur i Kualifikimit ka konfirmuar në detyrë Gjyqtaren Apelit të Vlorës Brikena Ukperaj. Komisioni nuk mori parasysh 12 ankesa nga qytetarët në drejtim të saj, duke vlerësuar se bëhej fjalë për çështje të cilat mund të merreshin nga gjykatat e shkallëve më të larta.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.