Vetting, rrezikon Artan Laze – Nuk justifikon 4 apartamente, llogaritë dhe shkollimin e vajzës
Seanca dëgjimore me Gjyqtarin e Tiranës, Artan Laze, është shtrirë në një kalvar të gjatë, pasditen e së hënës. Si edhe në seancën e shtyrë pak ditë më parë, ai ka insistuar për përjashtimin e trupës gjykuese, pasi rivlerësimi i Lazes është bërë vetëm për pasurinë, dhe jo për dy komponentët e tjerë të Vetting-ut, profesionalizmin dhe integritetin personal. E pasuksesshme rezultoi edhe përpjekja e dytë e Lazes që kërkoi përjashtimin e Gjyqtares së Vetting-ut Brunilda Bekteshi, e cila në vitin 2016 ka qenë juriste e OSHEE-së dhe kishte kërkuar përjashtimin e Lazes. Trupa gjykuese i konsideroi pretendimet e Lazes si përpjekje për të zvarritur procesin dhe e paralajmëroi me gjobë.
Pas rrëzimit të kërkesës së Lazes, ka nisur zyrtarisht seanca dëgjimore, ku u bë me dije se Gjyqtari ka në pronësi dy apartamente me sipërfaqe përkatësisht 158 dhe 120 metra katrorë në Tiranë, një në Vlorë dhe një në Bulqizë. Komisioni ka përmendur një sërë problemesh me deklarimin e pasurisë së Gjyqtarit, mes të cilave edhe kontrata noteriale false, ashtu si dhe fshehje të shpenzimeve të shkollimit të vajzës në një kolegj privat. Transfertat bankare të Lazes binin ndesh me deklaratat e tij të pasurisë.
Vendimi përfundimtar për konfirmimin apo shkarkimin nga detyra të Artan Lazes do të jepet më 11 korrik. Artan Laze është një prej emrave që i nënshtrohet me përparësi Vetting-ut si kandidat për Këshillin e Lartë Gjyqësor. Ai është një prej gjyqtarëve të cilëve u është refuzuar pajisja me vizë nga Shtetet e Bashkuara të Amerikës. Ndërkohë që ka qenë edhe pjese e Komisionit Qendror të Zgjedhjeve.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.