Vetting-u në Policinë e Shtetit, drafti merr aprovimin e ambasadorëve – Xhafaj: Proces shumë i vështirë për njerëzit e përfshirë
Ministria e Brendshme ka vijuar takimet konsultative në lidhje me procesin e vetting-ut në radhët e Policisë së Shtetit, Gardës së Republikës dhe SHÇBA. Në një tryezë me ambasadorët dhe oficerët e kontaktit, u prezantua projektligji, i cili brenda pak javësh pritet të jetë në Kuvend për miratim.
Ambasadorët, pasi u njohën me detajet për realizimin e procesit të Vettingut, shprehën mbështetjen e tyre.
“Me këto masa konkrete, Ministria e Brendshme na tregoi të gjithëve ne, që nuk kemi vetëm premtime, por elementë konkrete të implementimit. Do të thoja që është edhe shembulli i shkëlqyer për disa vende të tjera, se sa larg po shkojnë tani më autoritetet shqiptare, në gatishmërinë e tyre të madhe, për të trajtuar si duhet problemin e korrupsionit, si një prej pengesa më të mëdha për suksesin e shoqërisë shqiptare për mirëqenien e saj”, u shpreh Ambasadorja e Kroacisë, Sanja Bujas-Juraga.
Ndërsa ministri i brendshëm Fatmir Xhafaj, tha se asistenca dhe monitorimi ndërkombëtar do të jetë e nevojshme për të garantuar cilësinë dhe standardet e procesit.
“Besojmë se mbështetja e kësaj ekspertize do të shërbejë edhe si garanci, edhe si inkurajim, edhe si motivim nëse dëshironi ta them edhe këtë, për organet e vlerësimit që do të përfshihen, për njerëzit që do të përfshihen në këtë proces vlerësimi, sepse ato do të investohen në një proces të vështirë, shumë të vështirë. Sepse nuk besoj se është e lehtë, dhe ju që e njihni sadopak realitetin, edhe në vendin tonë, edhe në rajonin tonë, në ndërmarrje të kësaj natyre, ku do të duhet të japësh verdiktin për të larguar nga radhët e Policisë së Shtetit, individë që deri më sot mund të jenë konsideruar edhe shumë të fuqishëm brenda kësaj organizate”, tha Xhafaj.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.