Vetting-u shkarkon 47% të magjistratëve – 90 gjyqtarë e prokurorë të përjashtuar pasi nuk justifikuan dot pasurinë e lidhjet, 38 të dorëhequr

90 gjyqtarë e prokurorë janë shkarkuar deri në prill të këtij viti nga Komisioni i Pavarur i Kualifikimit, shkalla e parë e Vetting-ut të gjyqtarëve e prokurorëve.  Kësaj liste i duhen shtuar edhe rreth 38 dorëheqje, të cilat kanë ardhur në masë të madhe për shkak të procesit të Vetting-ut, madje disa prej tyre kanë ndodhur edhe ndërsa procesi ishte në faza përfundimtare. Janë këto treguesit e procesit të rivlerësimit të gjyqtarëve e prokurorëve të publikuara nga Komisioni i Pavarur i Kualifikimit për periudhën shkurt 2018-prill 2020.

Sipas të dhënave të Komisionit, afërisht 47% e gjyqtarëve e prokurorëve të kaluar në sitë janë shkarkuar, ndërkohë që 101 janë konfirmuar në detyrë.

Komisioni bën me dije se deri në prill të këtij viti ka dhënë në total 246 vendime, ndër të cilat 101 vendime për konfirmimin në detyrë të 44 gjyqtarëve, 48 prokurorëve dhe 9 ndihmësve ligjorë/kandidatë për magjistratë;

Nga ana tjetër janë dhënë 90 vendime për shkarkimin nga detyra të 56 gjyqtarëve, 32 prokurorëve dhe 2 ndihmësve ligjorë/kandidatë për magjistratë.

Paralelisht janë dhënë 38 vendime për ndërprerjen e procesit për shkak të dorëheqjes së gjyqtarëve e prokurorëve.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.