Vidhen përsëri kriptovaluta – “Bithumb” ndërpret shërbimin, njofton vjedhjen e $30 mln në monedha
Bursa e kriptovalutave në Korenë e Jugut, Bithumb, bëri të ditur se ka pezulluar përkohësisht shërbimet e depozitimit dhe tërheqjes, pas vjedhjes së më shumë se 30 milionë dollarë në kriptovaluta.
Operatori në Seul, publikoi në Twitter se monedhat e vjedhura do të mbulohen nga rezervat e veta të Bithumb dhe aktivet e të gjithë përdoruesve do të transferohen në portofolin më të sigurt të quajtur “cold wallet”.
Bursa nuk njoftoi se kur do të rikthejë shërbimet e tërheqjes dhe depozitimit. Bitcoin ra në 6,561 dollarë pas publikimeve të Bithumb, sipas indeksit që gjurmon kriptovalutën i Coindesk. Sipas të dhënave, vlera e Ethereum ra gjithashtu në 521 dollarë.
Korea e Jugut është një qendër gjigante e tregtimit të kriptovalutave dhe Bithumb, është një nga bursat me më shumë fluks. Më herët gjatë muajit, një bursë më e vogël, Coinrail, njoftoi se është hakuar dhe se ishin vjedhur kriptovalutat më pak popullore si Pundi X.
Rënia në vlerë e Bitcoin erdhi gjithashtu pas një shitjeje nën panik më të gjerë, duke ndjekur një raport të Wall Street Journal, ku thuhej se rregullatorët në SHBA po hetojnë mundësinë e manipulimit të çmimit në 4 bursa të mëdha.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.