Vidhnin pika karburantesh në Fier nën kërcënimin e armës – Ndalohet autorja, në kërkim bashkëpunëtori i saj

Specialistët e Seksionit për Hetimin e Krimeve kundër pronës dhe pasurisë në Drejtorinë Vendore të Policisë Fier kanë zbardhur tre ngjarjet e ndodhura gjatë këtij muaji në Qarkun e Fierit. Dy persona shkonin gjatë orëve të natës për të vjedhur pika të ndryshme karburantesh nën kërcënimin e armës.

Aktualisht është ndaluar një prej autorëve të dyshuar, shtetësja me inicialet A.M, 31 vjeçe, banuese në fshatin Visokë, Mallakastër. Ndërsa, sipas Policisë po punohet për kapjen e shtetasit E.G, 22 vjeç, banues në fshatin Belinë, Patos.

Ndërkohë, janë sekuestruar në cilësinë e provës materiale automjeti me të cilin shtetasit qarkullonin për të kryer vjedhjet, 1 armë gjahu teke dhe 6 fishekë, si dhe 1 palë doreza dhe 4 targa mjeti të falsifikuara.

“Të dy këta shtetas( kushërinj), nën kërcënimin e armës, në datën 02.07.2018, në Levan, kanë vjedhur një pikë karburanti ku kanë marrë shumën prej 30000 lekësh të reja.

Në datën 07.07.2018, në Mallakastër, nën kërcënimin e armës kanë tentuar të vjedhin një pikë karburanti por pasi janë ndeshur me punonjësin e karburantit, janë larguar.

Në datën 15.07.2018, në lagjen “1 Maji” Fier, në bashkëpunim, duke kërcënuar me armë gjahu teke, kanë tentuar të vjedhin një tjetër pikë karburanti”, thuhet më tej në njoftimin e Policisë.

Ndërkohë, materialet i kaluan Prokurorisë pranë Gjykatës së Shkallës së Parë Fier për veprat penale “Vjedhja me armë”, e kryer në bashkëpunim e mbetur në tentativë” dhe “Prodhimi dhe mbajtja pa leje e armëve dhe municionit luftarak” parashikuar nga Nenet 140, 22, 25, dhe 278 të Kodit Penal.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.