Vidhte goma e disqe makinash, Policia e Shtetit arreston autorin – Ja si të mbroni automjetin tuaj
Kishte kryer 11 vjedhje vetëm brenda një viti. Viktimat ishin pronarët e automjeteve, të cilët në mëngjes zbulonin se automjetit të tyre u ishin vjedhur gomat.
Policia njoftoi të enjten finalizimin e operacionit të koduar “Gomat”, ku ra në pranga 30-vjeçari E.Z., i dënuar më parë për veprën penale të vjedhjes.
Në zona të ndryshme të Tiranës, e madje edhe në Kavajë, hajduti kishte vjedhur 1, 2, 3, ose të katërta gomat, në varësi të kohës që kishte në dispozicion.
Policia sekuestroi në cilësin e provës materiale: Goma automjetesh, dadiçekë, disqe mjetesh, kriko, pamje filmike të kamerave të sigurisë në vend dhe mjeti tip “Volkswagen”, në pronësi të të arrestuarit, shtetasit E. Z.
Gomat e makinës janë një shënjestër e lehtë për hajdutët. Edhe makinat me sisteme alarmi janë vulnerabël, ndërsa gomat e një cilësie të lartë dhe disqet mund të shiten për një shumë të konsiderueshme të hollash në tregun e zi, duke arritur edhe në 300 euro për një set me 4 goma të përdorura.
Mënyrat për të parandaluar vjedhjen
- Parkoni makinën në një garazh të mbyllur nëse mundeni, ose në një garazh të hapur, i cili ruhet nga dikush.
- Instaloni një alarm makine, i cili përfshin edhe sensorë që ngjiten tek gomat. Në këtë mënyrë, nëse makina ngrihet, apo nëse dikush do të prekë gomat, alarmi do t’u lajmërojë dhe do të trembë hajdutin.
- Parkoni në një zonë me shumë trafik dhe lëvizje. Sa më shumë njerëz e makina të kalojnë pranë vendit ku parkoni, aq më i ulët rreziku që dikush t’ju vjedhë gomat.
- Kthejini gomat kur parkoni. Kjo i bën ato më të vështira për t’u hequr, pasi bllokimi i gomave kur makina është e fikur detyron hajdutët të ndezin kuadrin.
- Përdorni bllokues në secilën rrotë, edhe tek ato rezervë. Bllokuesit i bëjnë dadiçekët më të vështirë për t’u hequr pa çelës. Por është e rëndësishme që të mos e humbisni çelësin, pasi do t’ju duhet për ta ndërruar kur çahet goma.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.