Vihet në funksion ujësjellësi Çermë-Tërbuf-Sulzotaj – Përfitojnë 22 mijë banorë të 9 fshatrave
Ka përfunduar ndërtimi i ujësjellësit të ri Çermë- Tërbuf-Sulzotaj, ku përfitues janë 22 mijë banorë të 9 fshatrave të Divjakës dhe Lushnjës.
Tashëm banorët e fshatrave Çermë e Sipërme, Çermë e Proshkë, Tërbuf, Kamp, Çermë e Poshtme, Çermë Shkumbin dhe Suzotat të Divjakës, si dhe fshatrat Thanasaj e Dushk në Lushnje kanë ujë 24 orë në rubinetat e tyre.
Fondi Shqiptar i Zhvillimit, që ishte edhe zbatuesi i projektit tha se ka nisur puna për nisjen e kontratave të reja me banorët, të cilët prej vitesh përdornin ujë nga puse për plotësimin e nevojave të tyre.
Aktualisht, FSHZH po zbaton programin e Ujësjellësit Ruralë III i cili ka një shtrirje gjeografike në të gjithë vendin dhe kap vlerën 40 milionë euro, një financim që vjen si bashkëpunim i qeverisë shqiptare me BE dhe qeverinë gjermane përmes KfW. Projekti parashikon ndërtimin e ujësjellësve në Korçë, Kukës, Dibër, Elbasan, Vlorë, Lezhë, Tiranë, Durrës e Berat.
Ndërkohë, pritet të nisë së shpejti programi për Ujësjellësit Ruralë IV, i cili ka në fokus Bashkinë e Himarës. Përmes tij synohet t’i jepet fund problemit të furnizimit me ujë të pijshëm si dhe parashikon gjithashtu edhe trajtimin e ujërave të ndotura në bregdetin e jugut.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.