Vijojnë investimet edhe në zonat periferike të Tiranës – Transformohet blloku i banimit në Sauk
Investimet e Bashkisë së Tiranës janë shtrirë edhe në zonat periferike të saj. Ka përfunduar kështu rikonstruksioni i bllokut të ri të banimit në Sauk, i cili kufizohet nga rruga ‘Herman Gmeiner’ dhe ‘Selim Brahja’.
I pranishëm në mbylljen e punimeve, krybashkiaku, Erion Veliaj, tha se ky investim është një tregues që Bashkia po u kushton vëmendje të njëjtë të gjitha zonave të Tiranës.
“Sot edhe Sauku i Vjetër i ngjan 35 këndeve të tjera të lodrave që kemi bërë në gjithë Tiranën, për t’iu thënë të gjithë fëmijëve se nuk ka rëndësi ku e kemi shtëpinë, në Sauk të Vjetër, në Kombinat, në Bllok, në Allias, në Laprakë, në Kinostudio, por kushtet i kemi njësoj”, tha Veliaj.
Ndërhyrjet e kryera në këtë bllok banimi përfshijnë këndet çlodhëse, sistemin e kanaleve të ujërave të shiut, gjelbërimin, ndërtimin e trotuareve, asfaltimin e rrugës si dhe ndërhyrje të tjera. Veliaj iu bëri thirrje qytetarëve që të mirëmbajnë investimet e reja publike.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.