Vijon aksioni i gjelbërimit, Veliaj: Rekordi i 100 mijë pemëve mund të arrihet para datës 21 mars

Bashkia e Tiranës vijon aksionin për mbjelljen e pemëve në kryeqytet. Kryetari Erjon Veliaj u shpreh gjatë mbjelljes së  50 selvi të tjera në Unazën Lindore në Tiranës, se me ritmin me të cilin po ecën ky aksion, rekordi i 100 mijë pemëve mund të arrihet edhe para datës 21 Mars.

“Ky është kampionati më i madh i gjelbërimit që po zhvillohet në Tiranë. Jemi shumë pranë rekordit tonë të 100 mijë pemëve deri në 21 mars, por ashtu si Erkandi, ca rekorde i kemi vetë në dorë, ndaj kemi vendosur ta thyejmë këtë rekord. Po stërvitemi që ndoshta edhe ta thyejmë para 21 marsit, duke qenë se jemi shumë pranë këtij numri të paprecedentë të mbjelljeve në Tiranë”, tha kreu i Bashkisë së Tiranës.

Pjesë e aksionit për mbjelljen e pemëve në Tiranë janë bërë biznese të ndryshme si donator dhe emra të njohur të jetës publike për të ndërgjegjësuar qytetarët për rëndësinë e gjelbërimit të qytetit.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.