“Viktima” e dytë e Vetting-ut – Shkarkohet Gjyqtari Besim Trezhnjeva, nuk justifikoi dot pasurinë
Gjyqtari i Apelit të Durrësit Besim Trezhnjeva është “viktima” e dytë e Vetting-ut, i cili nuk justifikon dot pasurinë me të ardhurat familjare. Trupi gjykues i Komisionit të Pavarur të Kualifikimit dha paraditen e së premtes vendimin për shkarkimin e Trezhnjevës, i cili iu nënshtrua vetëm verifikimit të pasurisë, pa dy komponentët e tjerë që janë integriteti dhe profesionalizimi. Trezhnjeva nuk justifikoi dot pasurinë e përbërë nga 20 milionë lekë, dy apartamente në Tiranë dhe një në Durrës.
“Trupa e konsideron të përfunduar seancën dëgjimore për subjektin e rivlersimit, z. Besim Trezhnjeva. Në përfundim të procesit të rivlerësimit trupa gjykuese e përbërë nga Alma Faskaj, kryesuese, Firdes Shuli relatore, Roland Ilia, anëtar vendosi të shkarkojë nga detyra subjektin e rivlerësimit, zotin Besim Trezhnjeva, gjyqtar i Gjykatës së Apelit Durrës”, u shpreh Alma Faskaj, Kreu i Trupit Gjykues.
Fatmir Braka, avokati i gjytarit Besim Trezhnjeva tha se vendimi ishte tërësisht i padrejtë dhe i pabazuar në të ardhurat reale të klientit të tij. Në mbrojtje të klientit të tij Braka tha se Komisioni i Vetting-ut ka refuzuar caktimin e një eksperti të pavarur për të bërë vlerësimin e pasurisë, ndërkohë që një ekspertizë e tillë, e bërë më parë, ka nxjerrë rezultate krejt të tjera.
“Nuk e quaj normale, megjithatë ata kanë vendosur kështu. E keqja është se asnjë e drejtë jona e mbrojtjes nuk u mor parasysh, nuk ka gjykim, aty thuhet se ka gjykim të thelluar që s’është e vërtetë, sepse gjykimi i thelluar duhet që ne të na ishte bërë ekspertizë, nuk ka objektivitet”, u shpreh avokati Braka.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.