Viktimat nga tërmeti, PD dorëzon kallëzimin penal në SPAK për kryebashkiakë dhe zyrtarë të lartë

Partia Demokratike ka kallëzuar në SPAK, kryebashkiakun e Tiranës Erjon Veliaj, të Krujës Artur Bushi, ish-kryetarët e Durrësit, Valbona Sako dhe Vangjush Dako dhe dy ministra Sandër Lleshajn me Besa Shahinin lidhur me pasojat e tërmetit të 26 Nëntorit të vitit të kaluar.

Selia blu i akuzon për 5 vepra penale:

“Shpërdorim detyre”

“Vrasje nga pakujdesia” në rrethana rënduese

“Shkelja e barazisë së pjesëmarrësve në tendera apo ankande publike”

Korrupsioni pasiv i personave që ushtrojnë funksione publike”

“Korrupsioni pasiv i funksionarëve të lartë shtetëror ose i të zgjedhurve vendorë”.

Në kallëzimin e firmosur nga Sekretari i Përgjithshëm i Partisë Demokratike Gazment Bardhi (selia blu ka publikuar vetëm faqen e parë dhe të fundit) që mban datën 22 janar të këtij viti kryebashkiaku i Krujës akuzohet për neglizhencë për shembjen e dy pallateve në Thumanë që mori 24 jetë njerëzish.

Kallëzimi i PD-së thekson se “zyrtarët publikë me vetëdije të plotë nuk kanë marrë asnjë masë për parandalimin e këtyre pasojave dhe pse kishte informacion të plotë dhe të detajuar në lidhje me pasigurinë që këto objekte paraqesin, por me shpërfillje totale dhe pas pasojave të tërmetit të datës 21.09.2019, përsëri refuzoi të ndërmerrte masat ligjore”. Kjo shpërfillje totale për jetët njerëzore nga zyrtarët publikë e bën vdekjen e 24 qytetarëve në Thumanë një “vrasje shtetërore”, për të cilën duhet të përgjigjen penalisht personat përgjegjës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.