“Virusi është i paparashikueshëm”, AstraZeneca: Mund të kërkojë vaksinim çdo 12 muaj

Vaksina e ardhshme e koronavirusit mund të duhet të injektohet çdo 12 muaj, sipas gjigantit farmaceutik AstraZeneca.  Firma britanike është një ndër kompanitë që po përpiqet të zhvillojë një vaksinë të Covid-19. AstraZeneca deklaroi këtë Javë se fazat e fundit të testimeve po zhvillohen në Mbretërinë e Bashkuar, Brazil dhe Afrikë të Jugut, ndërkohë që pritet të nisin së shpejti edhe në Shtetet e Bashkuara.

Këto teste synojnë të verifikojnë si reagon sistemi imunitar ndaj vaksinës.  Më herët gjatë muajit, vaksina që po zhvillohet në bashkëpunim me universitetin e Oksfordit, ofroi kundërpërgjigje premtuese imunitare në fazat fillestare të testimit tek njerëzit.  Megjithatë, kompania e farmaceutikës ngriti mundësinë se mund të duhet më shumë se 1 injeksion në të ardhmen, nëse puna rezulton e suksesshme, për shkak të paparashikueshmërisë së Covid-19.  “Ajo që dimë është se shumica e kompanive po synojnë 2 injeksione për vaksinimin fillestar dhe më pas supozimi jonë bazuar tek ajo çfarë djmë nga teknologjia që përdorim me SARS 1 është se imuniteti mund të zgjasë 12-18 muaj”, – tha Pascal Soriot, ekzekutivi i AstraZeneca.  Ai shtoi se virusi është shumë i paparashikueshëm.

Klevis Llaha / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.