Virusi godet turizmin francez – Le Maire: Ka pasur një rënie me 30-40% të vizitorëve
Sektori i turizmit në Francë ka marrë një goditje si pasojë e koronavirusit, sipas Ministrit të Financave të vendit, Bruno Le Maire. “Kemi më pak turistë në Francë, rreth 30-40% më pak se sa pritej”, tha Bruno Le Maire, pas mbledhjes së ministrave të financave dhe bankierëve qendrorë të G20 në Riad. Sipas tij, ndikimi do të jetë i madh për ekonominë franceze.
Koronavirusi që u shfaq për herë të parë në fund të 2019-s në qytetin kinez të Vuhanit, ka vrarë deri më tani 2,500 persona në Kinë. Për shkak të ndalimit të udhëtimeve, kërkesa për fluturime ka rënë, duke sjellë mbi 200,000 anulime.
Franca është një nga vendet më të vizituara në Botë. Sipas Ministrisë për Europën dhe Punëve të Jashtme, 89.4 milionë njerëz kanë vizituar Francën në vitin 2018 dhe turizmi zë 8% të Produktit të Brendshëm Bruto. Vendi mirëpret 2.7 milionë turistë kinezë çdo vit, sipas Le Maire. Franca ka raportuar deri më tani 12 raste të të infektuarve dhe 1 vdekje.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.