Virusi te pulat e ngrira nga Brazili – Zbulohet në Shenzhen. Kina paralajmëron publikun për ushqimin

Një provë nga krahët e ngrirë të pulave të importuara në Shenzhen nga Brazili, ka dalë pozitive me koronavirus, sipas autoriteteve lokale, ç’ka rrit shqetësimet se dërgesat e infektuara ushqimore mund të shkaktojnë vatra të reja.  Qendra lokale e kontrollit të sëmundjeve testoi një provë të sipërfaqes të marrë nga krahët e pulës, duke bërë kontrollin rutinë të importeve të mishit që u caktua në Qershor, pas një përhapjeje në Pekin që u lidh me një qendër ushqimore. Zbulimi vjen një ditë pasi gjurmët e koronavirusit u zbuluan në paketimin e karkalecave të ngrirë nga Ekuadori.

Kina ka shtuar monitorimet në porte, për shkak të shqetësimeve mbi importet e ushqimit.  Autoritetet shëndetësore të qytetit jugor të Shenzhenit gjurmuan dhe testuan të gjithë personat që mund të kenë pasur kontakt me produktet e infektuara ushqimore dhe të gjithë rezultatet ishin negative.  Sipas zyrtarëve kinezë, është e vështirë të zbulohet se në të cilën fazë u infektua pula e ngrirë.  Selia e Parandalimit të Epidemive në Shenzhen, deklaroi se publiku duhet të jetë i kujdesshëm për të reduktuar rrezikun e infeksionit nga mishi dhe ushqimet e detit të importuara.

Përveç monitorimit të kontejnerëve në portet kryesore,  Kina ka pezulluar disa importe të mishit nga origjina të ndryshme, përfshirë Brazilin.  Autoritetet e Qendrës Kineze të Vlerësimit të Sigurisë Ushqimore, kanë bërë të ditur më herët gjatë Korrikut se ekziston mundësia që ushqimi i ngrirë i infektuar mund të shkaktojë përhapje të reja. Viruset mund të mbijetojnë deri në 2 vite në temperatura prej -20 gradë Celsius, por shkencëtarët thonë se nuk ka prova të forta deri më tani që koronavirusi mund të përhapet nëpërmjet ushqimeve të ngrira.

Klevis Llaha/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.