Vit “ i artë” për krimin kibernetik – 400 milionë dollarë të vjedhura nga platformat e kriptomonedhave!

Raporti për kriptomonedhën në vitin 2021 ka përfundur dhe nga informacionet e detajuara rezulton se gjatë vitit të kaluar hakerët në Korenë e Veriut kanë vjedhur 400 milionë dollar asete dixhitale.Sipas raportit asetet dixhitale të vjedhura rezultojnë të jenë marrë përgjatë 7 sulmeve në platformat e kriptomonedhave.

Kompania e analizës së Blockchain Chainalysis tha se ishte një nga vitet më të suksesshme të regjistruara për kriminelët kibernetikë në Azinë Lindore.Sulmet kanë pasur  në shënjestër kryesisht firmat e investimeve dhe shkëmbimet e centralizuara.Koreja e Veriut ka mohuar në mënyrë rutinore të jetë përfshirë në sulme hakere që i atribuohen atyre.

“Nga viti 2020 deri në 2021, numri i hakimeve të lidhura me Korenë e Veriut u rrit nga katër në shtatë dhe vlera e nxjerrë nga këto hakime u rrit me 40%,” tha Chainalysis në një raport .

Hakerët përdorën një sërë teknikash, duke përfshirë joshjet e phishing, shfrytëzimet e kodit dhe malware për të hequr fondet nga kuletat “të nxehta” të organizatave dhe më pas i zhvendosën ato në adresat e kontrolluara nga Koreja e Veriut, tha kompania.Kuletat e nxehta të kriptomonedhave janë të lidhura me internetin dhe rrjetin e kriptomonedhave dhe kështu janë të prekshme ndaj hakerimit. Ato përdoren për të dërguar dhe marrë kriptovaluta.

Shumë ekspertë rekomandojnë lëvizjen e sasive të mëdha të kriptomonedhave që nuk nevojiten çdo ditë në kuleta “të ftohta”, të cilat janë shkëputur nga interneti më i gjerë.Sulmet kibernetike prekën që nga bankat deri te studiot e filmit të Hollivudit. /BBC

Vjola Gremi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.