‘Vitet e humbura’ të kooperativave, amendamenti: Të njihen sigurimet për efekt pensioni!
Në Kuvend është depozituar një projektligj që ka si qëllim njohjen si periudhë sigurimi për efekt përfitimi nga sigurimet shoqërore, të periudhave të punësimit në ish-kooperativat bujqësore, për të cilat në Drejtorinë e Arkivit Qendror të Institutit të Sigurimeve Shoqërore nuk është dorëzuar dokumentacion i plotë për vjetërsinë në punë nga data e krijimit deri në hyrjen në fuqi të ligjit nr. 7501 date 19 .07.1991, ” Për tokën”, i ndryshuar.
“Me anë të këtij projektligji i jepet zgjidhje problematikës shumëvjeçare në lidhje me vjetërsinë pune pranë ish kooperativave bujqësore. Në shumë raste regjistrat e këtyre kooperativave janë dorëzuar të mangët ose nuk janë dorëzuar fare.
Një pjesë e këtyre regjistrave u shkatërruan gjatë trazirave të vitit 1997 dhe për këtë shkak periudhat e vjetërsisë në punë pranë kooperativave bujqësore nuk u janë njohur anëtareve të këtyre kooperativave, në mënyrë që të vërtetojnë periudhën e vjetërsisë në punë.
Këta persona u janë drejtuar gjykatave. Ndjekja e procedurave gjyqësore ka patur dhe ka një kosto finaciare për këtë kategori, e cila është shlyer nga vetë personi ose nga vetë organet e sigurimeve shoqërore.
Nëpërmjet këtij projektligji synohet njohja si periudhë sigurimi për efekt përfitimi nga sigurimet shoqërore koha e punësimit në ish-kooperativat bujqësore nga mosha për pune e përcaktuar në legjislacionin e kohës, por jo më heret se viti i krijimit të kooperativës bujqësore” shkruhet në relacionin e nismës.
Njohja e periudhës së sigurimit për efekt përfitimi nga sigurimet shoqërore në varësi të periudhës së deklaruar nga vetë personat kërkues, bëhet respektivisht me ditë, muaj apo vite të plota pune, vetëm kur vërtetohet se gjatë periudhës së deklaruar përfituesi
-nuk ka qenë duke vuajtur dënimin me heqje lirie;
-nuk ka qenë përfitues i pensionit të invaliditetit të plotë;
-ka qenë banor i territorit në të cilin ka shtrirë aktivitetin e saj ish-Kooperativa Bujqësore.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.