“Viti i Skënderbeut” – Çelet në Prizren ekspozita me monedha dhe kartëmonedha shqiptare 1921-1996
Është çelur ditën e djeshme ekspozita e përkohshme “Gjergj Kastrioti Skënderbeu në monedhën dhe kartëmonedhën shqiptare” në qytetin e Prizrenit. Ekspozita erdhi si një bashkëpunim i Bankës së Shqipërisë me Bankën Qendrore të Kosovës në kuadër të Vitit Mbarëkombëtar të heroit tonë kombëtar.
Në ceremoninë e hapjes së saj ishin të pranishëm presidenti i Shqipërisë, Ilir Meta, kryeministri i Kosovës, Ramush Haradinaj si dhe personalitete të rëndësishme të dy vendeve.
Monedha dhe kartëmonedha shqiptare të viteve 1921-1996 që paraqesin Skënderbeun dhe simbole të lidhura me të ishin edhe koleksioni i prezantuar në këtë ekspozitë, i përzgjedhur nga BSH.
Ekspozita e cila do të qëndrojë e hapur deri më 12 qershor do të shoqërohet edhe me një kënd edukativ. Përmes tij, publiku i grupmoshave të ndryshme do të mund të njihet jo vetëm me funksionet e bankave qendrore të dy vendeve, por edhe me tematika të tjera të edukimit financiar.
Kjo ekspozitë e përkohshme u çel për herë të parë më 17 janar 2018 në Muzeun e Bankës së Shqipërisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.