Vizita e drejtorit të BB – Pagano, prezantim në Bankën e Shqipërisë
Drejtori ekzekutiv i Bankës Botërore për Shqipërinë, Patrizio Pagano, do të vizitojë të martën Shqipërinë. Gjatë vizitës, ai do të zhvillojë një prezantim para mediave të përqendruar në çështje që lidhen me ndikimin e teknologjisë dhe kapitalit njerëzor në nxitjen e rritjes së produktivitetit. Produktiviteti i dobët vlerësohet si një nga dobësitë e mëdha strukturore të ekonomisë shqiptare dhe një faktor që e bën atë më pak konkurruese në raport me vendet e rajonit dhe më gjerë. Institucionet e specializuara kanë vënë vazhdimisht theksin te nevoja për të rritur produktivitetin e punës.
Aktualisht, Banka Botërore ka 24 projekte aktive në Shqipëri, të shtrira në sektorë të ndryshëm, që nga infrastruktura dhe mjedisi e deri tek shëndetësia dhe forcimi i kapaciteteve mbikëqyrjëse të tregjeve financiare.
Që prej vitit 2014, Patrizio Pagano është drejtor ekzekutiv në Bankën Botërore për shtatë vende, mes të cilave Italia, Greqia dhe Shqipëria. Para se t’i bashkohej Bankës Botërore, Pagano ka punuar në Bankën e Italisë, në Divizionin e Ekonomive të Zhvilluara dhe Financës Ndërkombëtare.
Sipas informacionit zyrtar të Bankës Botërore, Pagano është autor dhe bashkëautor në shumë artikuj makroekonomikë, të financës, tregtisë, ndërsa mban një doktoraturë nga Universiteti i Pavias në Itali.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.