Vizita e Zhang – Pritet në takim nga guvernatori i BSH Sejko
Guvernatori i Bankës së Shqipërisë, Gent Sejko, priti në një takim zëvendësdrejtorin e Përgjithshëm i Fondit Monetar Ndërkombëtar, Tao Zhang.
Gjatë takimit, Guvernatori u shpreh se sistemi financiar shqiptar karakterizohet nga tregues të qëndrueshëm. Ai u ndal te nxitja e kreditimit të shëndetshëm dhe reduktimi i kredive me probleme, raporti i të cilave në muajin dhjetor shënoi vlerën 13.2%. Më tej, Guvernatori Sejko prezantoi paketën e deeuroizimit, si një iniciativë me mjaft rëndësi, e cila, nëpërmjet masave konkrete për rritjen e përdorimit të monedhës kombëtare, do të mundësojë rritjen e efektivitetit të politikës monetare dhe forcimin e stabilitetit financiar.
Nga ana e tij, Zëvendësdrejtori i Përgjithshëm i FMN-së Tao Zhang, vlerësoi Bankën e Shqipërisë për politikat e ndërmarra prejj saj, të cilat kanë kontribuar në ruajtjen e stabilitetit makroekonomik dhe konsolidimin e sistemit financiar.
Duke u ndalur në aktivitetin ekonomik, ai theksoi se ruajtja e ritmit të reformave dhe forcimi i mirëqeverisjes kanë rëndësi të veçantë për të përmirësuar klimën e biznesit dhe për të thithur sa më shumë investime të huaja në Shqipëri.
Zëvendësdrejtori i FMN u prit në një takim edhe nga Ministri i Financave dhe Ekonomisë, Arben Ahmetaj.
Ersuin Shehu/SCAN
Zyrtari i lartë i FMN takon ministrin Ahmetaj – Zhang: Të gatshëm t’ju mbështesim në vazhdimësi
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.