Vizita te mjeku, “online” – 190 mln lekë për regjistrin e formularëve, tani ka gabime e të dhëna të pasakta
190 mln lekë do të kushtojë ngritja e regjistrit elektronik për formularët e vizitave të Mjekut të Familjes. Agjencia Kombëtare e Shoqërisë së Informacionit ka hapur procedurën e prokurimit publik, që do i hapë rrugën dixhitalizimit të të dhënave mjekësore për pacientët, ndërkohë që institucioni përfitues është Fondi i Sigurimit të Detyrueshëm të Kujdesit Shëndetësor. Megjithatë, hapja e kësaj procedure ka nxjerrë në pah situatën problematike që ekziston aktualisht nëpër qendrat shëndetësore.
Sipas dokumentete që shoqërojnë procedurën tenderuese, aktualisht formulari i vizitës plotësohet me dorë nga mjeku i familjes dhe më pas hidhen të dhënat në sistemin offline, që është i instaluar lokalisht pranë çdo Qendre Shëndetësore. Por, ky informacion mblidhet çdo muaj pranë drejtorive rajonale dhe më pas përqendrohet në drejtorinë qendrore të Fondit, çka sjell vështirësi në marrjen në kohë të informacionit, gabime të mëdha dhe pasaktësi përgjatë plotësimit dhe hedhjes në sistem të informacionit nga formularët.
Gjithashtu, në dokumente pranohet se kjo ka sjellë edhe një vendimmarrje jo të sakta lidhur me indikatorët që dalin nga përpunimi i të dhënave të këtij sistemi. Ndërkaq, objektivi i dixhitalizimit flet për miradministrim të të dhënave si dhe përmirësimin e shëndetit dhe kujdesit shëndetësor për të gjithë shtetasit.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.