Vjen ilaçi i shtrenjtë, Rama: Sigurojmë zgjidhje përfundimtare. Vokshi: Shfaqje e radhës
Qeveria është duke siguruar një zgjidhje përfundimtare për furnizimin e Shërbimit të Onkologjisë, me herceptinë, një medikament për trajtimin e kancerit të gjirit.
Garancia është dhënë nga kryeministri, Edi Rama një javë pasi një mësuese nga Rrësheni, shprehu publikisht shqetësimin për ndërprerjen e kurimit, pasi ky ilaç mungonte në Qendrën Spitalore Universitare “Nënë Tereza”.
“Së pari, kemi pasur një problem shumë të madh këtë vit, se për herë të parë, edhe për shkak të ndryshimit të qeverisë dhe historirave të vitit të kaluar, nuk u bë lista e barnave të rimbursueshme në kohë. Tani, procesi është vënë në vijë dhe përsa i përket këtij ilaçi, që është shumë i shtrenjtë, tmerrësisht i shtrenjtë, ne diskutuam një mënyrë alternative, me një marrëveshje kuadër me kompaninë e huaj që e sjell. Është një metodë që e përdorin edhe në vendet e BE-së, për të mundur që ta marrim me çmim të arsyeshëm dhe ne do bëjmë çmos që ta plotësojmë këtë”.
Ndërkaq, kurimi ka rifilluar për të gjitha gratë që trajtohen me këtë medikament.
“Një seancë e hercepetinës me doza normale shkonte 2 mijë euro. Bënim 18 të tilla gjatë një viti. Kjo është vetëm për një grua. Janë 140 gra. Për fat të mirë, furnizimi me herceptinë erdhi, që do mbulojë jo vetëm Valbonën, por edhe të gjitha gratë që ishin në pritje”.
Dhurata Tarifa, Shefe e Shërbimit të Kemioterapisë.
Por, një ditë më parë deputetja e Partisë Demokratike, Albana Vokshi e konsideroi daljen e kryeministrit Rama, një shfaqje të përgatitur me të sëmurët në onkologjik. “Propaganda e tyre s’ka limite , mund të përdorë këdo në nevojë. Sot e kanë radhën të sëmurët me kancer”, shkruajti Vokshi në Facebook.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.