Vjen “Tirana Economic Forum”! Detajet e forumit të SCAN, që bashkon autoritetet e ekonomisë e politikës së 6 vendeve e Ballkanit Perëndimor
“Tirana Economic Forum” është një forum rajonal që zhvillon edicionin e tij të parë në Tiranë ditën e sotme.
“FUTURE BALKANS: TOWARDS A GLOBAL INCLUSION (Ballkani i së ardhmes: Drejt një përfshirje globale) është tema e këtij edicioni. Qëllimi i kësaj konference është të mundësojë një platformë diskutimi e propozimesh konkrete për përfshirjen e 6 vendeve të Ballkanit Perëndimor në agjenden globale të zhvillimit.
Kjo është një iniciativë e SCAN Media Group, që sëbashku me partnerët, organizon këtë event që mund të konsiderohet si më i madhi i kësaj natyre i organizuar nga ndonjë media shqiptare.
Në këtë event, nga Shqipëria marrin pjesë Presidenti i Republikës Sh.T.Z. Ilir Meta, Guvernatori i Bankës së Shqipërisë Gent Sejko, Kreu i Autoritetit të Mbikëqyrjes Financiare Ervin Koçi, Zv.Kryeministrja Senida Mesi , kryetari i Bashkisë së Tiranës Erion Veliaj, ministri i Financave dhe Ekonomisë Arben Ahmetaj, Ministrja e Shtetit për Mbrojtjen e Sipërmarrjes Sonila Qato etj.
Nga Kosova pjesëmarrës është zëvëndëskryeministri Enver Hoxhaj, kreu i Odës së Tregtisë Safet Gërxhaliu etj. Ndërkohë, në forum marrin pjesë edhe krerët e Bursave dhe krerët e Dhomave të Tregtisë dhe Industrisë të vendeve të Europës JugLindore.
Fjalën e hapjes së punimeve të forumit do ta mbajë Dr.Mag.Elvana Hana, drejtuese e SCAN Media Group.
Diskutimet janë të ndara në tre sesione, ku secili prej tyre përmban një tematikë: Lidershipi dhe institucionet, Tregjet kapitale financiare, Sipërmarrja private. Moderatorë të sesioneve janë ekspertët e njohur të ekonomisë Adrian Civici, Genc Ruli e Artan Hoxha.
Në fund të diskutimeve do të jepen edhe rekomandimet përkatëse.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.