Vjen tjetër linjë “low cost” – Oslo-Tiranë do të operojë vetëm gjatë muajve të verës

Një tjetër kompani ajrore low-cost duket se do t`i bashkohet flotës së aeroportit Nënë-Tereza. Aeroporti i vetëm i Shqipërisë, po tërheq gjithmonë e më shumë interesin e kompanive ajrore, sidomos nga ato vende ku nuk ka linje direkte fluturimi.

Së fundmi ka qenë pikërisht kompania low-cost norvegjeze, Avinor që ka njoftuar se, destinacioni i ri Tiranë-Oslo do të jetë një prej itinerareve më të reja të kompanisë. Itineraret e tjera do të jenë drejt Italisë dhe Spanjës.

Fluturimet nga Oslo drejt Tiranës do të fillojnë prej datës 29 qershor, dhe do të përfundojnë më 11 gusht.

Gjatë kohëve të fundit, interesi i turistëve nga vendet e Europës veriore, përfshirë vendet skandinave është rritur ndjeshëm. Edhe shifrat më të fundit të INSTAT për hyrjen e turistëve të huaj në vend e vërtetojnë këtë trend të ri.

E ndërkohë që pak vite më parë, udhëtimi drejt Shqipërisë mbetej pengesa numër një, sot, kjo problematikë duket më pak prezente, paçka se ka ende shumë punë për t`u bërë në këtë drejtim.

Fluturime direkte nga kompani të tjera drejt Tiranës janë konfirmuar edhe nga Kopenhagen, Stockholm dhe Helsinki. Pak kohë më parë u konfirmua edhe fluturimi direkt Londër-Tiranë ndërkohë që gjatë vitit të shkuar, afrimi i Wizz air dhe Transavia ishin lajmet më të  bujshme sa i përket turizmit, jo vetëm hyrës, pro edhe dalës, pasi linjat low-cost i japin mundësi të shumta shqiptarëve që duan të vizitojnë Europën.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.