Vjosa Osmani takon Bashën/ Osmani: Miratoni rezulotë kundër krimeve serbe, Basha: Do heq taksën e Rrugës së Kombit
Vjosa Osmani në postin e presidentes në detyrë të Kosovës, ka ripërsëritur thirrjen drejtuar Parlamentit të Shqipërisë për të miratuar një rezolutë që dënon krimet e Serbisë. Takimin e radhës zonja Osmani e ka zhvilluar me kryetarin e Partisë Demokratike Lulzim Basha, ky I fundit u angazhua se me të ardhur në pushtet do të heqë taksën e rrugës së Kombit.
“Besoj që kërkesa jonë si Republikë e Kosovës, që Shqipëria të jetë shteti i dytë pas Kosovës që të dënojë gjenocidin serb në Kosovë nëpërmjet një rezolute është kërkesë plotësisht legjitime, kërkesë që nuk duhej të haste në vonesë apo pikëpyetje. Dua të falënderoj institucionet që i kam takuar deri tani, në veçanti presidentin Meta dhe sot të falënderoj kryetarin Basha në lidhej me përkrahjen që dha tani me këtë propozim, sepse është e domosdoshme që teksa i përket krimeve të llahtarshme që Serbia ka kryer në Kosovë nga krimet e luftës, krimet e njerëzimit dhe gjenocidi si qëllim i qartë i Serbisë që të shfarosë popullin tonë, ti dënojmë bashkarisht dhe me një zë të qartë.” – u shpreh Vjosa Osmania presidente në detyrë e Kosovës.
“Dua të paraqes para mediave dhe opinionit publike, para znj.Osmanit, institucioneve të Kosovës dhe qytetarëve të tyre, premtimin tim dhe Partisë Demokratike se pas 25 prillit do ketë një kthesë rrënjësore, një ndryshim rrënjësor të Tiranës në mbështetje totale të institucioneve të Kosovës dhe me vendosjen e marrëdhënies Shqipëri-Kosovë në rrafsh të parë duke zhbërë edhe atë që fatkeqësisht Komisioni Europian ka identifikuar si një rënie të nivelit të bashkëpunimit mes Tiranës dhe Prishtinës çka është e papranueshme për Partinë Demokratike. Në themel të ekzistencës ka qenë gjithnjë çështja kombëtare dhe jam krenar që personalisht dhe si pjesë e PD kemi bërë gjithçka për Pavarësinë e Kosovës dhe njohjen e saj ndërkombëtare dhe jam i brengosur që në një kohë të vështirë për Kosovën Prishtina zyrtare, institucionet e Kosovës dhe populli i saj nuk ka mbështetjen e duhur nga Shqipëria.” – u shpreh më tej z.Basha.
Kjo është vizita e parë e zonjës Osmani që nga marrja e detyrës si presidente, pas akuzave për krime lufte ndaj Hashim Thaçit, që çuan në dorëheqjen e tij.
Arbër Hitaj / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.