Vjosa Osmani, vizitë zyrtare në Tiranë, Meta: “Të thellohet bashkëpunimi mes Shqipërisë dhe Kosovës”

Presidenti i Republikës, Ilir Meta, ka pritur në një takim zyrtar Presidenten në detyrë të Republikës së Kosovës, Vjosa Osmani. Në konferencën e përbashkët për mediat, Meta tha se gjatë takimit, kanë vlerësuar të gjitha mundësitë që e bëjnë edhe më konkret bashkëpunimin mes dy vendeve tona, veçanërisht me konkretizimin e partneritetit strategjik.

“Vlerësuam të gjitha mundësitë që e bëjnë edhe më konkret bashkëpunimin mes dy vendeve tona, veçanërisht me konkretizimin e partneritetit strategjik në mënyrë që të jemi një shembull edhe për sa i takon standardeve të demokracisë, por njëkohësisht për sa i takon përparimit të procesit të integrimit europian në rajonin tonë. Marrëdhëniet shumë të mira ndërshtetërore kanë nevojë të gjenerojnë më shumë mundësi praktike në mënyrë që kufiri ndërshtetëror të bëhet i padukshëm, por dhe qytetarët tanë, bizneset, artistët, sportistët, intelektualët, njerëzit e shkencës, të rinjtë tanë edhe më shumë të afrohen dhe të shkëmbejnë eksperienca me njëri-tjetrin, dije, përvojë, kulturë dhe unë besoj se kjo do ndodhë më mirë në të ardhmen”, deklaroi Meta.

Ndërsa Vjosa Osmani, ka qenë e prerë, e qartë dhe me një qëndrim të pandryshuar sa i përket minishengenit rajonal, duke thënë se nuk e favorizon Shqipërinë dhe Kosovën.

“Sa i përket minishengenit kam akoma të njëjtin qëndrim. Ia kam përcjellë kryeministrit Rama gjatë vizitës në nëntor dhe do ta përsëris të njëjtën gjë dhe nesër. Ka shumë argumente mbi bazën e të cilëve kemi ndërtuar atë qëndrim. Ka shumë shpresa për ta bindur kryeministrin Rama që ky nuk është projekt që favorizon Kosovën dhe Shqipërinë.

Ne vetëm flasim, por nuk kemi asnjë dokument se çfarë është ky minishengen. Mendoj që nga fillimi është gabim. Kjo iniciativë nuk e ka përfshirë Kosovën nga fillimi, nuk është konsultuar Kosova. Presidenca nuk është njoftuar se çka zyrtarisht e ka qëllimin. Kemi iniciativa të tjera që përkundër mbështetjes së madhe ndërkombëtare, Serbia nuk i ka zbatuar. Mund të duket si një iniciativë që ka qëllimin e njëjtë por e mira do ishte të shkrihej në iniciativat e tjera.Kemi treguar dhe ofruar dorën e bashkëpunimit për gjithë rajonin, përfshirë Serbinë që nuk ka kërkuar falje për krimet e kryera. Ne kërkojmë përfshirje të barabartë. Ajo çka kemi dëgjuar nga mediat për minishengenin, në masë të madhe i shkojnë në leverdi Serbisë se sa Kosovës e Shqipërisë”, deklaroi Osmani.

Gjatë konferencës së përbashkët për mediat, presidenti Ilir Meta shprehu mbështetjen e plotë për ish-drejtuesit e UÇk-së, të cilët po përballen me drejtësinë, në Gjykatën Speciale në Hagë.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.