Miratohet vendimi – Vlera dhe kriteret e kompensimit të ushqimit të punonjësve

Këshilli i Ministrave ka miratuar sot vendimin për përcaktimin e kufijve dhe kritereve të shpërblimit që i korrespondon pagës së përfituar në natyrë dhe që i shtohet pagës për pushime vjetore.

Sipas këtij vendimi, punëdhënësit të cilët nuk mund të sigurojnë lokal për ngrënie me kushte higjienike të pranueshme, duhet t’i shpërblejnë punëmarrësit për ushqimin që konsumohet gjatë pushimit në ndërmarrje. Referuar vendimit, masa e shpërblimit është e barabartë me diferencën e çmimit të ushqimit, në rastet kur ky i fundit përgatitet nga i punësuari ose në kuzhina të përbashkëta me çmimet me pakicë në restorante.

Ndërkohë, lidhur sa i takon vlerës, mënyrave dhe kritereve të dhënies së pagës në natyrë, sipas vendimi kufiri i vlerës së shpërblimit në formën e pagës që është përcaktuar të jetë deri në masën 300 lekë për një vakt. Ndërsa, kur trajtohet me më shumë se një vakt për ditë punë, pagesa në natyrë parashikon masën deri në 500 lekë.

Po ashtu, sipas vendimit në kontratën kolektive apo individuale të punës, në bazë të indeksit të çmimeve të konsumit, palët mund të përcaktojnë edhe trajtime të tjera si dhe ndryshimin e pagesës në natyrë. Vendimi parashikon që shpërblimi në formën e pagës në natyrë mund të jepet në tre forma: në trajtim ushqimor, kupon dhe mall. Në rastet kur nuk mundësohet dhënia e shpërblimit në asnjërën prej tre formave të përmendura më lart, punonjësit do të mund ta marrin shpërblimin në para, i cili trajtohet si pagë për shkak të efekteve fiskale.

Ndërkohë, në rastet kur paga në natyrë zbritet nga paga e punonjësit, atëherë sipas vendimit shuma e këtij shpërblimi nuk mund të kalojë 20% të pagës mujore. Në rastet kur punëmarrësit nuk ka mundësi të kthehet në vendbanimin e tij, punëdhënësi është i detyruar që t’i sigurojë atij strehim.

Për efekt të llogaritjes së pagës për rastin e pushimeve vjetore, në vendim thuhet se:

“Shpërblimi që i përgjigjet pjesës së pagës së përfituar në natyrë përllogaritet si raport i ditëve të punës, gjatë të cilave punëmarrësi ka përfituar pagë në natyrë me numrin e përgjithshëm të ditëve gjatë të cilave ka punuar, shumëzuar me ditët e punës që përfshihen në periudhën e pushimeve vjetore dhe pagën ditore në natyrë, të përcaktuara në kontratën kolektive apo individuale të punës.”

Për zbatimin e këtij vendimi i cili shfuqizon edhe vendimin nr.139, datë 14.3.2007, i Këshillit të Ministrave, “Për kufijtë e përcaktimit të pagës në natyrë dhe kriteret e përllogaritjes së shpërblimit, që i shtohet pagës për leje vjetore”, ngarkohet ministri i Financave dhe Ekonomisë. Vendimi hyn në fuqi menjëherë pas botimit të tij në “Fletoren Zyrtare.”

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.