Vlera e shpronësimit, me negocim – Projektet infrastrukturore, Pr.ligji: Krijimi i Agjencisë do ulë borxhin ndaj pronarëve
Vlera e shpronësimit dhe afati i shlyerjes për pronarët që preken nga projektet infrastrukturore do të përcaktohen duke negociuar me mes pronarit dhe Agjencisë Shtetërore të Shpronësimit”.
Gjithçka përcaktohet në një projektligj të propozuar nga qeveria e që ka mbërritur në kuvend për diskutim, i cili shihet si domosdoshmëri për të përmirësuar procedurat e shpronësimit, për shkak të problematikave të krijuara deri më tani në zbatim të projekteve rrugore, por jo vetëm.
Ndryshimi kryesor lidhet pikërisht me krijimin e Agjencisë Shtetërore të Shpronësimit, duke përqendruar procedurat e shqyrtimin dhe trajtimit të kërkesave në një institucion të vetëm.
Sipas relacionit që shoqëron projektligjin, kjo Agjenci do të reduktojë reagimin negativ të subjekteve, duke negociuar dhe sqaruar me secilin prej tyre për kriteret, mënyrat, vlerësimin dhe gjithë procesin e shpronësimit në tërësi si dhe do të ulë numrin e ankesave në gjykatë nga subjektet që do të shpronësohen.
Po ashtu, me krijimin e Agjencisë së Shpronësimit pritet të ulet borxhi deri në reduktimin final të tij, duke parashikuar dhe mundësuar pagesën me këste ndaj subjekteve të shpronësuara.
Shpronësimet mund të konsiderohen një nga pengesat kryesore në drejtim të zbatimit të projekteve infrastrukturore, që jo rrallë herë kanë krijuar vonesa të tej zgjatura për përfundimin e tyre.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.