Vlerat në tregun e aksioneve – Investitorët presin korrigjim, diversifikojnë zotërimet me lëndë të para
Shumë investitorët po i drejtohen lëndëve të para, duke u përpjekur që të diversifikojnë zotërimet e tyre, prej shqetësimeve për një korrigjim në tregun e aksioneve, ndërkohë që vlerat e tyre kanë arritur nivel rekord. Normat e ulëta të interesit, rritja e fortë ekonomike në të gjithë botën dhe rezultatet pozitive të korporatave kanë rritur S&P 500 me 16% këtë vit. Ndërkohë, indeksi Goldman Sachs i lëndëve të para ka shtuar vetëm 7% për këtë periudhë.
Në 5 vitet e fundit, divergjenca është akoma më e theksuar. Standard & Poors 500 ka shtuar 82% gjatë kësaj periudhe, ndërsa indeksi i lëndëve të para ka rënë me 34%. Sipas analistëve, kjo tendencë mund të ndryshojë. Kërkesa e fortë në tregjet e naftës dhe tkurrja e ofertës, po ndryshon perspektivën duke rritur flukset monetare drejt këtyre aktiveve. Çmimet e naftës shënuan së fundmi nivelin më të lartë në 2 vite e gjysmë.
Ndërsa tregu i lëndëve të para është tejet i vogël në krahasim me tregun e kapitaleve dhe aktiveve me të ardhura fikse, një zhvendosje drejt këtij aktivi mund të vërtetojë shqetësimet e investitorëve për mbivlerësimin e aksioneve.
Sipas të dhënave të Reuters, fondet që investojnë në lëndë të para kanë pasur flukse hyrëse prej 324 milionë dollarë, gjatë javës së fundit. Në Gusht, flukset drejt fondeve të përbashkëta dhe fondet e listuara në bursë (ETF) të lëndëve të para, shënuan 2.1 miliardë dollarë, niveli më i lartë në 6 vite.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.