Vlerat unike të radhiqes së kuqe
Në Shqipëri e njohim si Bresa dhe në rajone të ndryshme të vendit njihet edhe si çikore e kuqe, kore, rëkore, parkalidhe, radhiqe e kuqe, një perime që i përket familjes botanike të Asteraceae me emërtimin botanik Cichorium intybus. Ka një shije karakteristike pikante dhe të hidhur, e cila zbutet pas gatimit. Radhiqja e kuqe u jep ngjyra të ndezura menuve të ndryshme, por edhe garanton shëndet të mirë. Ajo përmban të gjitha vlerat shëndetësore të zarzavateve me ngjyra të ndezura.
Nëse besoni në fuqinë e spinaqit, atëherë do të admironi plotësisht forcën e radhiqes së kuqe. Nisur nga kërkesat e shumta për këtë perime në tregjet e huaja, si pasojë e pranisë së saj të përhapur gjerësisht në mënyrën mesdhetare të ushqimit, radhiqja e kuqe është një nga perimet që inkurajohet të kultivohet edhe në Shqipëri. Fitimet për fermerët janë disafish më të larta se nga kultivimi i lakrave të zakonshme, ndërsa kërkesat e tregut venda shumë pak mbulohen nga prodhimi shqiptar.
Bresa tërheq menjëherë vëmendjen falë ngjyrës së ndezur të kuqe dhe damarëve të bardhë. Ngjan me lakrën dhe të bie menjëherë në sy nëse vendoset krah zarzavateve dhe perimeve të tjera. Ngjyra nuk është e vetmja karakteristikë që e bën të veçantë rradhiqen e kuqe. Lexuesit besnikë të AgroWeb.org tani e kanë mësuar që ngjyra tek perimet dhe zarzavatet është tregues i antioksidantëve.
Çikorja e kuqe është lehtësisht e kombinueshme me të gjitha perimet dhe barishtet e gjelbëra në kuzhinë. Ajo është plot veti ushqyese dhe vlera shëndetësore. Më poshtë do të gjeni vlerat shëndetësore të rradhiqes së kuqe:
Përmban antioksidantë dhe jep energji Radhiqja e kuqe përmban shumë antioksidantë dhe konsiderohet një perime që jep shumë energji. Në 100 gramë rradhiqe të kuqe do të gjeni mbi 3500 njësi antioksidantësh.
Forcon metabolizmin dhe sistemin imunitar Rradhiqja e kuqe ndihmon metabolizmin, duke garantuar kështu mirëqenie të plotë për gjithë organizmin. Perimja e kuqe forcon imunitetin, falë pranisë së vitaminës C, një antioksidant që promovon shërimin e plagëve dhe detoksifikimin. Kjo vitaminë e rëndësishme promovon një stomak të shëndetshëm dhe rrit prodhimin e kolagjenit.
Lufton radikalet e lira Radhiqja e kuqe është mjaft efikase në luftimin e radikaleve të lira që dëmtojnë qelizat e ADN-së, duke shkaktuar sëmundje të rrezikshme si ajo e zemrës, diabetit dhe kancerit. Ajo ka një kapacitet të lartë në përthithjen e radikaleve të rrezikshme dhe nxjerrjes së tyre jashtë trupit.
Ndihmon në humbjen në peshë Radhiqja e kuqe është e pasur me fibër ndaj është e këshillueshme nëse dëshironi të të humbni në peshë. Fibra ju bën të ndiheni të ngopur dhe të humbisni peshë në mënyrë graduale.
E pasur me minerale dhe vitamina Radhiqja e kuqe është e mbushur me minerale të rëndësishme si zinku, bakri dhe magnezi. Ajo është e pasur me vitaminë C, thiaminë, riboflavinë, niacinë, vitaminë B-6, A dhe E. Ia vlen të përmendet se organizmat tanë janë në gjendje të përthithin vitaminat dhe mineralet më mirë kur ato përftohen nga perimet, siç është radhiqja e kuqe se sa nga suplementët farmaceutikë.
Rregullon sheqerin në gjak Radhiqja e kuqe ndihmon në mbajtjen nën kontroll të nivelit të sheqerit në gjak, duke minimizuar kështu rreziqet e sëmundjeve kardiovaskulare. Kjo ndodh falë prezencës së insulinës, një substancë që rregullon sheqerin në gjak.
Ndihmon tëmthin Radhiqja e kuqe ndihmon sistemin tretës në sekretimin e lëngjeve të nevojshme që ndihmojnë uljen e kolesterolit por edhe shpërbërjen e yndyrave dhe aminoacideve.
Rregullon tensionin e gjakut Fito ushqyesit si likopeni, acidi elagjik dhe kuercitina janë përgjegjëse për ngjyrën karakteristike të radhiqes së kuqe. Këto elementë janë gjithashtu të dobishëm në uljen e tensionit të gjakut. Radhiqja e kuqe zakonisht konsumohet pasi e keni kavërdisur në vaj ulliri ose përfshirë në ushqime si oriz me perime. Ajo shërbehet edhe në makarona, apo për mbushjen e gatimit të shpendëve.
Burimi:Agroweb
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.