Vlerësimi i BSH – Ekonomia shqiptare, më optimiste se prishmëritë
Zhvillimet ekonomike e financiare në vend janë pozitive dhe konfirmojnë trendin rritës së ekonomisë shqiptare.
Aktiviteti ekonomik ka vijuar të rritet në mënyrë të qëndrueshme në fillim të vitit 2017, por inflacioni është ngadalësuar në tremujorin e dytë. Tregjet financiare janë të qeta dhe kushtet e financimit të sektorit privat janë përmirësuar.
Politika monetare lehtësuese vijon të jetë thelbësore në përmirësimin e kushteve të financimit, të cilat kanë përkrahur rritjen e investimeve dhe të konsumit, duke krijuar kështu premisa për rritjen e inflacionit drejt objektivit.
Ky është vlerësimi që Banka Qëndrore i bën situatës makro-ekonomike të vendit. Ekspertë të BSH, gjatë një prezantimi të Raportit Tremujor të Politikës Monetare, vlerësojnë se informacioni i ri ka qenë më pozitiv se pritjet për rritjen ekonomike, ndërsa vlera e inflacionit ka qenë disi më e ulët.
“Në vlerësimin tonë, faktorët që kanë ndikuar këto zhvillime kanë natyrë të përkohshme, duke mos prekur kahun dhe intensitetin e zhvillimeve të pritura në afatin e mesëm. Banka e Shqipërisë pret një përmirësim të mëtejshëm të rritjes ekonomike në afatin e mesëm, gjë që do të krijojë kushtet për rritjen dhe kthimin e inflacionit në objektiv brenda vitit 2018”, theksohet në këtë raport.
Ndërkohë bazuar në të dhënat e deritanishme Këshilli Mbikëqyrës ka gjykuar se intensiteti i stimulit monetar nuk do të ulet përpara tremujorit të dytë të vitit 2018.
Rënia e inflacionit në këtë tremujor është ndikuar, pjesërisht, nga vlerat e larta të inflacionit të shënuara në tremujorin e parë si pasojë e goditjeve të ofertës dhe, pjesërisht, nga efekti rënës i ardhur nga mbiçmimi i kursit të këmbimit.
Sipas ekspertëve të BSH, këto goditje do të kenë një ndikim kalimtar, ndërkohë që prodhimi i brendshëm bruto u rrit me 3.9% në nivel vjetor, i mbështetur nga rritja e prodhimit në të gjithë sektorët e ekonomisë, pasi përmirësimi i burimeve të financimit e forcimi i besimit të agjentëve ekonomikë kanë mbështetur rritjen e kërkesës së sektorit privat.
Gjallërimi i konsumit dhe i investimeve është ndihmuar edhe nga kushtet e favorshme të financimit dhe rritja e kredisë për sektorin privat.
Gjithashtu, shpenzimet buxhetore kanë ndikuar pozitivisht rritjen ekonomike dhe politika fiskale e ndjekur gjatë gjysmës së parë të këtij viti vlerësohet të ketë prodhuar një impuls pozitiv fiskal.
Në raportin e BSH theksohet fakti, se pritjet për një ecuri pozitive të ekonomisë janë forcuar, ku ndikim kryesor do të kenë rritja e investimeve publike e private, rritja e shpenzimeve konsumatore dhe zgjerimi i eksporteve.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.