Vlerësimi i gjendjes së mjedisit detar në Shqipëri, fondi për aplikuesit. Afatet për dorëzimin e projektit, dosja me dokumente
Në kuadër të prioriteteve kombëtare, Qendra Rajonale e Mjedisit hap thirrjen për aplikim për një fond të posaçëm për organizatat e shoqërisë civile në fushën e mjedisit, për një projekt me temë “Vlerësimi i gjendjes së mjedisit detar në Shqipëri”.
Në një njoftim për mediat thuhet se “Qendra Rajonale e Mjedisit (REC) Shqipëri, në kuadër të programit “Mbështetje për Organizatat e Shoqërisë Civile në fushën e Mjedisit në Shqipëri (SENiOR-II)”, mbështetur nga Qeveria Suedeze hap thirrjen për aplikim në kuadër të prioriteteve kombëtare, me tematikë “Vlerësim i gjendjes së mjedisit detar në Shqipëri”.
Gjithashtu në njoftim thuhet se qëllimi i granteve për prioritetet kombëtare lidhet me reagimin e shoqërisë civile ndaj prioriteteve kombëtare në fushën e mjedisit, përmes hartimit të një dokumenti në lidhje me këtë prioritet.
“Ky dokument duhet të këtë mendimin profesional të ekspertëve të shoqërisë civile, të përmbajë fakte dhe opinionin e shoqërisë civile, në lidhje me këtë prioritet e më pas të konsultohet apo t’i paraqitet dhe aktorëve shtetërorë për shqyrtim. Në këtë thirrje mund të marrin pjesë të gjithë organizatat që janë përfshirë apo që do të përfshihen në të ardhmen në programin SENiOR-II”, thuhet në njoftim.
Fondi i vënë në dispozicion për këtë projekt vlerësimi është 15 mijë euro, ndërkohë që afati për dorëzimin e draftit me propozime është deri më 31 Mars.
“REC Shqipëri do të mbështesë organizatën(at) fituese me një fond jo më të madh se ekuivalenti në Lekë i 15.000 Eurove. Afati i dorëzimit të projekt-propozimeve është data 31 mars 2017, ora 17.00. Projekt propozimet duhet të paraqiten në origjinal dhe një kopje e dokumenteve origjinal duhet dorëzuar në CD, në zyrën e REC Shqipëri brenda datës së caktuar. Për më shumë informacion klikoni këtu”, thuhet në njoftim.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.